Mustaqillik-bebaho neʼmat!

Mamlakatimiz mustaqillikka erishganiga 32 yil toʻldi. Mustaqilligimiz bu xalqimiz huquq va erkinligiga oʻzi egalik qilishidir. Oʻz huquq va erkinliklaridan samarali foydalana olish esa har bir insonning dunyoqarashi, isteʼdodi va qobiliyatini namoyon qilish, davlatning iqtisodiy-ijtimoiy rivojlanishida bevosita aloqador boʻlishni taʼminlaydi. Har bir fuqaro Vatan tuygʻusi bilan yashashi, oʻzi tugʻilib oʻsgan ona yurtini sevishi va ardoqlashi, vatan mustaqilligini mustahkamlashda oʻz hissasini qoʻsha olishi eng oliy tuygʻu hisoblanadi. Davlatimiz mustaqillikka erishgach vatanga boʻlgan qadr-qimmat va mehr-muhabbat ortdi, milliy qadriyatlarimiz, dinimiz, urf-odatlarimiz va bayramlarimiz yana tiklandi, xalqqa qaytarildi.

Mehr-oqibat, bagʻrikenglik, hamjihatlik kabi olijanob fazilatlar, milliy va umumbashariy qadriyatlarga hurmat, Vatan taqdiri va kelajagiga daxldorlik tuygʻusi yuragimizdan oʻrin olgan desam mubolagʻa boʻlmaydi.

Mustaqillik sharofati bilan biz oʻz tariximizni qayta oʻrgandik. Oʻz tariximizni oʻrganish va uni yetkazish orqali xalqimizning bilim va maʼnaviyati yuksalishida muhim ahamiyat kasb etmoqda. Ilm yoʻlida xizmat qilgan va kitoblari bizgacha yetib kelgan buyuk ajdodlarimizning, shonli tariximizda oʻzining kuch-qudrati bilan oʻchmas iz qoldirgan mard va jasur sarkardalarimizning hayot yoʻllari biz uchun ham iftixor ham namunadir.

Mamlakatimizda mustaqillik yillarida olib borilgan keng koʻlamli islohotlar natijasida milliy davlatchiligimiz poydevori mustahkamlanib, davlatimiz suvereniteti, chegaralarimiz daxlsizligi taʼminlandi, jamiyatimizda tinchlik va osoyishtalik, millatlararo totuvlik va diniy bagʻrikenglik muhitini kuchaytirish, qonun ustuvorligini taʼminlash, inson huquq, erkinliklari va qonuniy manfaatlarini taʼminlash hamda roʻyobga chiqarish boʻyicha ulkan ishlar amalga oshirildi.

Darhaqiqat, mustaqillik tufayli oʻzligimizni angladik, ozod xalq, mustaqil davlat sifatida Oʻzbekistonning bor boʻy-bastini, ulkan salohiyatini butun dunyoga namoyon qildik. Istiqlol tufayli yurtimizni jahon hamjamiyati tanidi, xalqimizning fidokorona mehnati-yu, yoshlarimizning har sohadagi yutuqlari, gʻayrati va azm-u shijoati tufayli vatanimizning shon-shuhratini dunyoga tanitmoqda.

Ayni vaqtda mamlakatimiz bosib oʻtgan taraqqiyot yoʻlining chuqur tahlili bugungi kunda jahon bozorida oʻzgarishlar kuzatilib, raqobat tobora kuchayib borayotganini har tomonlama hisobga olishni, shu asosda davlatimizni yanada barqaror va jadal surʼatlar bilan rivojlantirish uchun mutlaqo yangicha iqtisodiy strategik yondashuv va tamoyillarni ishlab chiqish va amalga oshirishni taqozo etmoqda.

Olib borilayotgan islohotlar samarasini yanada oshirish, davlat va jamiyat rivojini yangi bosqichga koʻtarish, hayotning barcha sohalarini liberallashtirish, mamlakatimizni modernizatsiya qilish boʻyicha eng muhim ustuvor yoʻnalishlarni amalga oshirish maqsadida hamda butun xalqimiz, ayniqsa, uning eng faol qatlamiga aylanib borayotgan tadbirkorlarni oʻylantirayotgan dolzarb masalalarni har tomonlama oʻrganish, amaldagi qonunchilik, huquqni qoʻllash va ilgʻor xorijiy tajribani tahlil qilish asosida koʻplab muhim qarorlar chiqarilib amalga tatbiq etilgan.

Mustaqillik natijasida vatanimizda inson qadr-qimmatining, shaʼni-gʻururining nechogʻlik ustun qoʻyilganligidan, yurtimiz tinchlik va barqarorlikka erishilganligidan, davlatimiz sarhadlarining daxlsizligi taʼminlanganligidan hamda millatlararo totuvlik va diniy bagʻrikenglikning mustahkamlanganligidan darak berishini unutmasligimiz darkor.

Albatta bu ulugʻ neʼmatni qadriga yetish, uni mustahkamligini barqaror qilish barcha yurtimiz fuqarolarining ulkan burchimizdir.

Shunday qilib Oʻzbekistonimiz mustaqilligining 32 yilligi bayramini dilda quvonch va katta shodiyonalar bilan kutib olish taraddudida turibmiz. Barcha yurtdoshlarimizga yaqinlashib kelayotgan bayram muborak boʻlsin! Mustaqilligimiz abadiy boʻlsin!

Shexroz Norov,

Oliy Majlis Senati huzuridagi Yoshlar Parlamenti aʼzosi, Xalq deputatlari Kogon tuman Kengashi deputati, Oʻzbekiston “Adolat” SDP Kogon tuman Kengashi raisi.