Mustaqillik eng ulugʻ, eng aziz neʼmat

Mustaqilligimizning 32 yilligiga bagʻishlab, “Adolat” SDP Buxoro viloyat Kengashi, Oʻzbekiston “Veteran” jangchi faxriy va nogironlari birlashmasi Buxoro viloyat boʻlimi, Olot tuman Nuroniylar Kengashi bilan hamkorlikda “Yangi hayot uchun, Yangi Oʻzbekiston uchun!” shiori ostida olotliklar uchun tadbir tashkil etildi.

Tadbirda Olot tuman Nuroniylar Kengashi rahbari S.Oqiyev soʻzga chiqib, barcha yigʻilganlarni yaqinlashib kelayotgan eng ulugʻ, eng aziz bayram Mustaqilligimizning 32 yillik shodiyonasi bilan samimiy qutladi. S.Oqiyev oʻz soʻzida bugungi dorilamon kunlarga yetib kelgunga qadar ne-ne mashaqqatlar chekilgani haqida gapirib, Mustaqilligimizni qadriga yetib yashash har birimizning oliy burchimiz ekanligini taʼkidladi.

Shu bilan birgalikda soʻnggi yillarda mamlakatimizda aholining hayot darajasi va sifatini yaxshilash borasida amalga oshirilayotgan ulkan bunyodkorlik ishlari toʻgʻrisida soʻz yuritib, fikr va mulohazalarini bildirdi.

Tadbir davomida soʻzga chiqqanlar tomonidan bugungi tinch va erkin hayotni qadrlab, shukronalik tuygʻusi bilan yashashga, mustaqilligimizni asrab-avaylagan holda hamjihatlikda taraqqiyotimiz uchun dadil olgʻa borishga daʼvat etildi. Uchrashuv soʻngida keksa avlod vakillari va yoshlar sportning shaxmat turi boʻyicha oʻzaro bellashdilar.

Bellashuv yakunida gʻolib chiqqanlar partiyaning esdalik sovgʻalari bilan taqdirlandilar.

“Yangi hayot uchun, Yangi Oʻzbekiston uchun!” ezgu gʻoyasini oʻzida mujassam etgan bunday tadbirlar viloyatimiz tuman va shaharlari boʻylab davom etmoqda.

Sanjar Maydonov,

“Adolat” SDP Buxoro viloyat Kengashi raisi oʻrinbosari.