Mustaqillik- mening baxtim

Mamlakatimiz mustaqilligining 32 yilligi faxr bilan aytishimiz mumkinki, shahar va qishloqlarda, mahallalarda, oilalarda ham katta bayram sifatida nishonlanmoqda. Mustaqillik xalqimizga erkinlik, koʻnglidagi orzulariga qanot berdi. Xotin-qizlar uchun yaratilgan imkoniyatlar, albatta, bizga kuch-gʻayrat bagʻishladi. Dastlab, “Ibratli bekam” oʻquv markazi faoliyatini Fargʻona shahridagi binolarni birida ijarada boshlagan edim. Tadbirkorlarga yaratilgan cheksiz imkoniyatlar tufayli shahar markazda uch qavatli bino qurib, koʻplab xotin-qizlarni ish bilan taʼminlashga erishdim.

Bugun bizni markazimizda tahsil olgan oʻquvchilar soni 56 ming nafardan oshib ketibdi. Ularning aksariyati, oʻzining qandolatchilik sexiga ega, moʻjazgina goʻzallik salonlarini tashkil qilib, oilasiga daromad olib kiryapti, yangi ish oʻrinlarini yaratishyapti.Bu borada ustozlarimiz ularga yaqin maslahatchi, koʻmakchi boʻlib kelishyapti.

Davlatimiz rahbari tomonidan yurtimizda tadbirkorlikni rivojlantirish uchun yaratilayotgan qulay muhit va shart-sharoitlar, ilgari surilayotgan yangi tashabbuslar, taqdim etilayotgan keng imkoniyatlar natijasida koʻplab xorijiy davlatlarda malaka oshirdim. Respublika Xotin-Qizlar qoʻmitasi tashabbusi bilan   Xitoy Davlatining Pekin shahridagi AIBO Akademiyasida tahsil olganim faoliyatimda tub oʻzgarishlar yasashimga zamin yaratdi. Yangi- yangi yoʻnalishlarni yoʻlga qoʻyib, yigit –qizlarimizni zamonaviy kasb –hunarlarga oʻrgatish uchun astoydil harakatdamiz.

Mehnatlarimiz doimo hukumatimiz tomonidan ragʻbatlantirib borilayotgani bizga yangicha kuch –gʻayrat bagʻishlaydi. Mamnuniyat bilan aytishim mumkinki, “Shuhrat” medali, “Eng faol tadbirkor “ koʻkrak nishoni sohibasiman.

Prezidentimizning xotin-qizlarga boʻlgan yuksak ishonchi natijasida tadbirkorlik bilan birga bugungi kunda “Adolat” SDP Fargʻona viloyat Kengashi raisi sifatida faoliyat koʻrsatib kelyapman. Partiya rahbari sifatida deputatlarimizning xalq muammolarini oʻrganishi, hal qilishi, ularga suyanch boʻlish borasidagi harakatlaridan quvonib ketaman. Yuzlab odamlarning muammolariga yechim topilyapti, yil sayin odamlarning partiyaga boʻlgan ishonchi ortyapti. Biz xalq farovonligi uchun, Vatan ravnaqi uchun doimo harakatda ekanligimizni his qilishyapti.

Mamlakatimiz mustaqilligining 32 yillik toʻyi biz uchun ham katta shodiyona. Bayram arafasida Fargʻona viloyat Kengashi deputati Zakirjon Rahmanov Prezidentimiz Farmoniga koʻra “Doʻstlik” ordeni bilan mukofotlandi, partiyaning Quvasoy shahar Kengashi mustaqil binosiga ega boʻldi. Bayram munosabati bilan xalqimizni, yoshlarni yagona maqsad yoʻlida birlashtirish istagida qator koʻrik tanlovlarni tashkil etdik, ularni munosib taqdirladik. Bayramni xalqimiz bilan hamjihat xursandchiliklar bilan qarshi olayotganimizdan baxtiyorman. Ilohim tinchligimizga koʻz tegmasin!

Barcha vatandoshlarimizni bayram bilan qutlayman. Bayram muborak boʻlsin!

    Shahnoza Gʻaniyeva,

“Adolat” SDP Fargʻona viloyat Kengashi raisi.