Mustaqillik — oliy neʼmat

Insondagi eng oliy tuygʻulardan biri bu Vatan tuygʻusidir. Oʻzi tugʻilib-oʻsgan ona yurtini jon qadar sevadigan, Vatanidagi katta-kichik yutuqlardan faxrlanadigan, qalb qoʻri, kuch va imkoniyatini shu jamiyat va tabiat goʻzalligi, rivojiga baxshida eta olgan insondagina bu tuygʻu namoyon boʻladi.      

Istiqlol el-yurtimiz uchun oʻz taqdirining haqiqiy egasi boʻlib, qadr-qimmatini anglab, munosib hayot kechirish, yurtimizda huquqiy demokratik davlat va fuqarolik jamiyatini barpo etish imkoniyatini yaratib berdi, desak mubolagʻa boʻlmaydi. Bu yil jonajon Vatanimiz – Oʻzbekiston Respublikasi oʻzining davlat mustaqilligini qoʻlga kiritgani va mustaqil taraqqiyot yoʻlini boshlaganiga 32 yil toʻldi. Mustaqillik yillarida koʻhna tariximiz, boy merosimiz, muqaddas dinimiz, urf-odat va anʼanalarimiz qayta tiklandi. Bugungi kunda mehr-oqibat, bagʻrikenglik hamjihatlik kabi olijanob fazilatlar, milliy va umumbashariy qadriyatlarga hurmat, Vatan taqdiri va kelajagiga daxldorlik tuygʻusi yuragimizning tubidan oʻrin oldi. Istiqlol tufayli oʻzligimizni angladik, ozod xalq, mustaqil davlat sifatida Oʻzbekistonning bor boʻy-bastini, ulkan salohiyatini butun dunyoga namoyon qilish imkoniyati ochildi. Ozodlik bois bizni jahon tanidi, xalqimizning fidokorona mehnati, yoshlarimizning gʻayrati, azm-u shijoati ila vatanimizning shon-shuhrati olam uzra yanada kengroq yoyilmoqda. Mustaqillik bergan beqiyos imkoniyatlar negizida ertangi kunimiz — erkin va farovon kelajagimizni oʻz qoʻlimiz bilan bunyod etmoqdamiz. Ayniqsa, soʻnggi yillarda iqtisodiyotda maʼmuriy-buyruqbozlikka asoslangan eski boshqaruv tizimidan voz kechilishi, pul-kredit siyosatining puxta oʻylab olib borilishi, kichik biznes va xususiy tadbirkorlik, fermerlik harakati uchun yoʻl ochib berilishi, iqtisodiyotning yuqori surʼatlar bilan rivojlanishini taʼminlash, eng muhimi, xalqimizning hayot sifati darajasini oshirilishi va bu harakatlarning hammasi inson qadrini ulugʻlashga qaratilgani katta ahamiyat kasb etmoqda. 2023-yilning “Insonga eʼtibor va sifatli taʼlim” yili deb nomlanishi bugungi kunda respublikamizda Inson qadri hamma narsadan ustunligidan dalolat beradi.  

Ona Vatanimizning tarixini esga olar ekanmiz buyuk ajdodlarimiz, shonli oʻtmishi kishini oʻyga toldiradi. Buyuk saltanat asoschisi Sohibqiron Amir Temur, ajdodlarimiz Abu Rayhon Beruniy, tib ilmining namoyandasi Abu Ali ibn Sino, gʻazal mulkining sultoni Alisher Navoiy, sulton Jaloliddin Manguberdi, yulduzlarni kashf qilgan Mirzo Ulugʻbek, Hind sari yoʻl olgan Zahiriddin Muhammad Bobur, matematika fanida nollik sistemani (“0” sistemasini) yaratgan bobokalonimiz Al Xorazmiy, millatni uygʻotishga shaylangan va qatagʻon boʻlgan jadid bobolarimiz esga tushadi. Bugungi kunning yoshlari ajdodlarimizning boy meroslarini qadrlagan holda yurtimiz, Vatanimiz rivojiga hissa qoʻshishib, ularga munosib avlod boʻlib yetishishimiz lozim deb uylayman.

                                                                                              Dilrabo Yo’ldosheva,

 “Adolat” SDP Xorazm viloyat Kengashi mutaxassisi.