Mustaqillik ulug’ ne’mat

Mustaqillik — xalqimizga erkinlik va ozod hayotni tortiq qilgan, shaʼnimiz, milliy ongimiz, qadr-qimmatimizni tiklab, barchamizga oʻzligimizni anglash tuygʻusini, qadriyat va urf-odatlarimizni qaytarib bergan buyuk neʼmat.

Oʻzbekiston Respublikasi oʻz davlat mustaqilligini qoʻlga kiritgan buyuk tarixiy sana 1991- yil 1sentyabr xalqimizning ijtimoiy-siyosiy, maʼnaviy hayotida beqiyos oʻrin egallagan, har yili eng ulugʻ, eng aziz bayram sifatida katta shod-xurramlik bilan nishonlanadigan qutlugʻ ayyomdir. Bu yil Vatanimiz, mamlakatimiz istiqlolining shonli sanasi – milliy mustaqilligimizning nishonlash arafasidamiz.

Bu yil mamlakatimiz hayoti va taqdirida tub burilish yasagan, tom maʼnodagi buyuk, olamshumul voqea – Oʻzbekiston Respublikasi davlat mustaqilligi eʼlon qilinganiga 32 yil toʻladi. Shu davr ichida milliy maʼnaviyatimiz bulogʻi qayta koʻz ochdi, xalqimiz oʻzligiga qaytdi. Inson manfaatlari hamma narsadan ustun qoʻyildi, har bir inson chinakamiga eʼzoz-u hurmat, qadr topdi.

Prezidentimiz rahbarligida birgina taʼlim sohasida izchil islohotlar amalga oshirildiki, ularning sanab adogʻiga etish qiyin. Xususan, iqtidorli oʻquvchilarni aniqlash, ular qobiliyatini rivojlantirish, maktab taʼlimiga oʻqitishning ilgʻor metodlarini joriy etish, zamonaviy bilimlar va chet tillarni puxta oʻrgatish maqsadida Prezident, ijod va ixtisoslashgan maktablar faoliyati yoʻlga qoʻyildi.

Ushbu maktablarning tashkil etilgani taʼlim tizimida yuksalishning yangi bosqichini boshlab berdi. eng muhimi, yurtimiz kelajagi uchun xizmat qiladigan iqtidorli, qobiliyatli, ilm-fanga mehr qoʻygan yoshlarning yanada koʻpayishiga zamin yaratdi.

Shu oʻrinda taʼkidlash joizki, Oʻzbekistonning mustaqillik yillarida xotin-qizlarga eʼtibor davlat siyosati darajasiga koʻtarildi. Oila kodeksida turmushda, oilaviy munosabatlarda ayollarning erkaklar bilan teng huquqli ekani, oila davlat tomonidan muhofaza etilishi oʻz aksini topgan. Shu vaqtga qadar ayollar huquqi himoyalangan koʻplab qonun hujjatlari qabul qilindi. Ayniqsa, xotin-qizlarimizni ish bilan taʼminlash, tadbirkorlik qilishlariga erkinlik berish, ragʻbatlantirish borasida sezilarli ishlarni kuzatish mumkin.

Bunday yuksak marralarga, albatta, mustaqillik tufayli, Prezidentimiz rahbarligida amalga oshirilgan izchil islohotlar natijasida erishdik. Buni jamiyatimiz, davlatimiz va xalqimiz hayotida yuz bergan buyuk oʻzgarishlar, ayniqsa, taʼlim tizimini rivojlantirish, pedagoglarning malakasi va jamiyatdagi nufuzini oshirish, oʻqituvchi kasbining, nufuzini oshirish, oʻqituvchilar oyligini oshirishga qaratilayotgan katta eʼtibor misolida ham koʻrish mumkin.

Bu qutlugʻ sana davlatimiz va jamiyatimizning bugungi taraqqiyot darajasi, xalqaro maydondagi obroʻ-eʼtiboriga munosib yuksak saviyada, umumxalq bayrami sifatida keng nishonlash boʻyicha har yili davlatimiz rahbarining tegishli qarori qabul qilinadi.

Prezidentimizning “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni yuqori saviyada oʻtkazish toʻgʻrisida”gi qaroriga asosan, bu yilgi tashkiliy-amaliy, maʼnaviy-maʼrifiy tadbirlar “Yangi hayot uchun Yangi Oʻzbekiston uchun” degan bosh gʻoyani oʻzida mujassam etgan shior asosida kutib olinishi qalbimizda faxr va iftixor tuygʻularini joʻsh urdirdi, desak aslo mubolagʻa boʻlmaydi.

Amalga oshirilgan islohotlar nafaqat mamlakatimizda katta ijobiy oʻzgarishlarga olib keldi, hatto xalqaro maydonda ham mamlakatimiz obroʻ-eʼtiborini yangi bosqichga olib chiqdi.

Gʻolibona bosib oʻtilgan 32 yillik yoʻlga nazar solsak, bu oʻzgarishlar yaqqol koʻzga tashlanadi. Milliy istiqlol sharofati tufayli oʻzligini tanib, qadr-qimmatini topib, qad rostlayotgan, oʻziga xos taraqqiyot va yuksalish yoʻllarini belgilab, istiqbolning koʻz ilgʻamas yorqin ufqlari sari muzaffar odimlar tashlab borayotgan Oʻzbekistonimizning jahon uzra eʼzoz-u eʼtibor, shon-u shuhratga sazovor boʻlib, qanchalab xorijiy ellar, davlatlar bilan turli-tuman aloqalarda, hamkor-u hamjihatliklarda boʻlib kelayotganligi, teran, baquvvat ildizlari asrlar qaʼriga borib tutashuvchi asl milliy qadriyatlarimiz, sharqona urf-odatlarimiz, ajoyib-gʻaroyib anʼanalarimiz, goʻzal udumlarimiz, din-u iymonimiz, eʼtiqod-u eʼtimodimiz, qayta tiklanganligi, hayotda oʻz oʻrnini topayotganligi hamda xalqimizning bebaho maʼnaviy mulkiga aylanib borayotganligi – bular bugun kechayotgan dorilamon davrimizning betakror, beqiyos xarakterli belgilaridandir. Istiqlol-oʻzaro hurmat, bir-birini tan olish, bir-birini qadrlash asosida mamlakat fuqarolarining oʻzaro munosabatida ham, jahon davlatlari oʻrtasidagi aloqalarda ham ana shu umuminsoniy qadriyatlarga tayanish, ana shu umumiy mezonlar asosida yashash demakdir.

Mustaqilligimizning oxirgi yetti yilida Respublikamizning barcha joylarida shahar va qishloqlarida, turli sohalarda ancha ishlar qilindi. Har jihatdan oʻzini anglayotgan millat ulugʻ bunyodkorliklar qilishga kirishib ketdi. Oʻtgan 32 yil ichida Oʻzbekiston tanib boʻlmas darajada oʻzgardi. Nafaqat koʻchalar va xiyobonlar, bu davrda jamiyat va odamlar ham oʻzgarib, yurtdoshlarimiz erkin fikrlay boshladilar. Har kimning oʻz vazifasiga nisbatan masʼuliyati ham ortdi. Shu bilan birga yoshlarda Vatanga sadoqat hissi kuchaydi. Inson uchun ozodlikdan qadrli neʼmat yoʻq. Dunyodagi jamiki bunyodkorlik va yaratuvchanlikning asosi – ozodlikdir. Tarixan qisqa bir davrda, avvalo el-yurtimizning xohish-irodasi, kuch-qudrati, mashaqqatli va bunyodkorona mehnati evaziga jahon xaritasida yangi, oʻz kuchi va salohiyatiga tayangan, bugun taraqqiyot yoʻlidan barqaror surʼatlar bilan rivojlanib borayotgan mustaqil, suveren Oʻzbekiston davlatining paydo boʻlishi, hech shubhasiz, xalqimizning tarixiy gʻalabasidir.

Albatta, bugungacha boʻlgan yoʻlni osonlikcha bosib oʻtmadik. Hayotning ming-ming mashaqqati, sinovidan xalqimizning matonati mehnati, nuroniy otaxon onaxonlarning ezgu niyat tilaklari, yoshlarimizning azm-u shijoati xalqparvar rahbarning odilona oqilona siyosati natijasi bu. Va umuman, biz uchun yangi davr, erkin va ozod hayotni boshlab bergan shu qutlugʻ sana arafasida xalqimiz qanday mashaqqatli va ayni vaqtda sharafli yoʻlni bosib oʻtganini yana bir bor his etasiz.

Shunday kunlarda barcha sohada amalga oshirilayotgan xalqchil islohotlarni koʻrib, qalbimizdan bir tilak oʻtadi: har lahzada yangilanib, koʻrkamlashib borayotgan Oʻzbekiston manfaati yoʻlida mehnat qilishdan aslo tolmaylik. Hamisha Vatanimiz xizmatiga kamarbasta boʻlaylik!

Maqsud Hamidov,

Xalq deputatlari Buxoro viloyat Kengashi deputati,

“Adolat” SDP Buxoro viloyat Kengashi raisi.