Navoiyda Prezidentlikka nomzodning ishonchli vakili bilan uchrashuvlar boshlandi

Oʻzbekiston Respublikasi Prezidentligiga nomzod Maxmudova Robaxon Anvarovnaning Navoiy viloyatidagi ishonchli vakili Rustam Hayitovning Navoiy davlat pedagogika instituti axborot kutubxona resurs markazida saylovchilar bilan dastlabki uchrashuvi boʻlib oʻtdi.

Unda partiyaning Xalq deputatlari mahalliy Kengashlardagi deputatlari, partiya elektorati hisoblangan pedagoglar xodimlar, institut tyutorlari, talaba-yoshlar, partiya faollari va OAVlar vakillari ishtirok etdi.

Tadbirni partiyaning Navoiy viloyat Kengashi raisi oʻrinbosari A.Jaynarov kirish soʻzi bilan ochib, nomzodning ishonchli vakili bilan tanishtirdi.

Uchrashuvda soʻz olgan nomzodning ishonchli vakili Rustam Hayitov partiyadan Oʻzbekiston Respublikasi Prezidentligiga koʻrsatilgan nomzod Robaxon Maxmudovaning tarjimai holi bilan yigʻilganlarni batafsil tanishtirdi. Shundan soʻng nomzodning Saylovoldi dasturida oʻrin olgan muhim yoʻnalishlar boʻyicha ilgari surilayotgan takliflar xususida batafsil toʻxtaldi.

Qayd etilganidek, dasturda huquqiy davlat qurish, ijtimoiy adolatni qaror toptirish, fuqarolik jamiyatini barpo etish, iqtisodiyot, ilm-fanni rivojlantirish, oilani mustahkamlash, yuksak maʼnaviyatli jamiyat qurish kabi mamlakat ravnaqi va fuqarolar farovonligini ta'minlashda muhim ahamiyat kasb etuvchi birqancha yoʻnalishlar qamrab olingan.

Uchrashuv yakunida ishtirokchilar Oʻzbekiston Respublikasi Prezidentligiga “Adolat” sotsial-demokratik partiyasidan koʻrsatilgan nomzod Robaxon Maxmudovaning Saylovoldi dasturi yuzasidan oʻz fikr-mulohazalarini bildirdilar va oʻzlarini qiziqtirgan savollarga javoblar oldilar.

Prezidentlikka nomzodning ishonchli vakili bilan uchrashuvlar davom etmoqda

“Adolat” SDP Navoiy viloyat Kengashi
matbuot xizmati