Nomzodlarning qonunchilik sohasidagi bilimlari sinovdan oʻtkazildi

Oʻzbekiston — yoshlar mamlakati. Shu boisdan istiqbolimiz egalari taʼlim-tarbiyasi va kamolotiga alohida eʼtibor qaratilyapti. Eng avvalo, bu sohadagi ishlarni tashkil etishning huquqiy asoslari doimiy ravishda takomillashtirib borilmoqda. Faol va iqtidorli yoshlarni qoʻllab-quvvatlash, siyosiy va huquqiy savodxonligini oshirish, ularning Oʻzbekiston Respublikasi Oliy Majlisi Qonunchilik palatasi faoliyatida jamoatchilik asosida ishtiroki taʼminlanishi ularga boʻlgan yuksak ishonchdir.

Oʻzbekiston “Adolat” SDP Qashqadaryo viloyat Kengashiga bugun 45 ming nafarga yaqin aʼzolar uyushgan boʻlsa, shularning qariyb 45 foizini yoshlar tashkil etadi. Partiyaning “Yosh adolatchilar” qanoti faollari ayni paytda viloyatni ijtimoiy-iqtisodiy rivojlantirish uchun barcha jabhada fidokorona mehnat qilishyapti. “Yosh adolatchilar” qanoti tashabbusi bilan viloyat va tumanlarda Yashil makon umummilliy harakati doirasida yoshlar bogʻi barpo etildi. Birgina oʻtgan yilning oʻzida ishsiz 900 nafar yoshlar “Yosh adolatchilar” qanoti saʼy-harakati bilan ishli boʻldi.

Mamlakatimizda yoshlarning bepul umumiy taʼlim olish huquqining kafolatlangani ham eʼtiborga molikdir. Bugungi kunda yurtimizda isteʼdodli yoshlarni qoʻllab-quvvatlash maqsadida koʻpgina ishlar amalga oshirilmoqda. Xususan, Davlatimiz rahbari tashabbuslari bilan Prezident maktablari, Temurbeklar maktabi, ijod va ixtisoslashtirilgan maktablarda ertangi kunimiz vorislariga berilayotgan zamonaviy taʼlim-tarbiya Yangi Renessansning mustahkam poydevori boʻlayotir. Quvonchli tomoni shundaki, mavjud sharoitdan kelib chiqqan holda zamon talablari va ijtimoiy-iqtisodiy oʻzgarishlar sharoitida bugungi yoshlarning talab va ehtiyojlarini oʻrganib, yangidan-yangi imtiyoz va imkoniyatlar eshigi ochib berilayotir.

Bugun Oʻzbekiston “Adolat” SDP Qashqadaryo viloyat Kengashida Oliy Majlis Qonunchilik palatasi huzuridagi Yoshlar parlamenti sayloviga hujjat topshirgan nomzodlarni saralash bosqichi boʻlib oʻtdi. Jarayonda nomzodlarning saylovoldi dasturlari yuzasidan taqdimoti oʻtkazildi.

Ochiq va oshkora oʻtgan saralash bosqichida nomzodlarning qonunchilik sohasidagi bilim va koʻnikmalari, takliflari, ijtimoiy-siyosiy hayotdagi faollik darajasiga jiddiy eʼtibor qaratilib, saylov hayʼati tomonidan nomzodlar ichidan munosiblari saralab olindi.

Endi ushbu saralab olingan nomzodlar saylovning yakuniy Respublika bosqichida ishtirok etadi.

Darhaqiqat, Yangi Oʻzbekistonda yoshlar siyosatini zamon talabidan kelib chiqib takomillashtirishda “Adolat” SDP faollari tomonidan amalga oshirilayotgan ishlar tahsinga sazovor. Partiyaning yoshlar kamolotiga qaratayotgan doimiy eʼtibori, ayniqsa, taʼlim islohotlarida yaqqol koʻzga tashlanmoqda. Partiyaning saylovoldi dasturida ham yoshlarning huquqiy ongi va madaniyatini yuksaltirishga, ularni har tomonlama qoʻllab-quvvatlashga alohida eʼtibor qaratilgan.

Umuman olganda mustaqil davlatimizda yaratilayotgan bunday imkoniyat va imtiyozlar oʻgʻil-qizlarimizni ertamizning munosib davomchilari etib tarbiyalashga xizmat qiladi.

Dilafruz Toʻychiyeva,
“Adolat” SDP, Qashqadaryo viloyat Kengashi
“Yosh adolatchilar” qanoti faoli.