Nuroniylar eʼzoz va ehtiromda

“Oʻzbekiston — inson qadri ulugʻlangan yurt” loyihasi doirasida Fargʻona shahridagi Nuroniylar maskanida “Keksalar maʼrifati” maʼnaviy maʼrifiy tadbiri tashkil etildi. Unda yurtimiz taraqqiyotiga munosib ulush qoʻshgan fidoiy insonlar, professor-oʻqituvchilar, yozuvchi va shoirlar, sportchilar, sanʼatkorlar, Oʻzbekiston qahramonlari, har sohada oʻziga xos va ibratli hayotiy tajriba maktabini yarata olgan nuroniylar ishtirok etdilar.

Fargʻona viloyat “Nuroniy” jamgʻarmasi rahbari, “Adolat” SDP viloyat Kengashi deputati Zokirjon Rahmonov davlat rahbarining “Nuroniylarni har tomonlama qoʻllab-quvvatlash, ularning turmush darajasini oshirishga doir qoʻshimcha chora- tadbirlar toʻgʻrisida”gi qarori asosida yurtimizda pir-u komillarimizga yaratilayotgan cheksiz imkoniyatlar haqida soʻz yuritdi. Shuningdek, Birlashgan Millatlar Tashkilotining Bosh assambleyasi tomonidan 1-oktyabr — Xalqaro qariyalar kuni deb eʼlon qilinganligini munosabati bilan oʻtkazilayotgan “Keksalar haftaligi”da har bir yoshi ulugʻlarni holidan xabar olinib, zarur hollarda ularga tibbiy va moddiy koʻmaklar berilayotganligini eʼtirof etdi.

Oʻzining boy hayotiy tajribalari bilan yosh avlodni ona Vatanga sadoqat ruhida tarbiyalash va mehnat jamoalari yutuqlarining salmogʻini oshirishga koʻmaklashayotgan bir guruh faxriylar viloyat hokimligining tashakkurnomalari bilan taqdirlandilar.

Tadbirda Oʻzbekistonda xalq artisti, Fargʻona davlat universiteti professori, ustoz sanʼatkor Sultonali Mannopov oʻz qoʻshiqlari bilan barchaga bayram kayfiyatini ulashdi.

“Adolat” SDP
Fargʻona viloyat Kengashi Matbuot xizmati.