Oʻqituvchi — kelajak bunyodkori

Prezidentimiz Qashqadaryoga tashrifini oʻqituvchilar bilan uchrashuvdan boshlagani biz uchun tarixiy voqea boʻldi. Men keksa pedagog sifatida hurmatli Prezidentimiz bilan yuzma-yuz suhbat kutubxonada oʻtganidan quvondim. Ziyo maskanida davlatimiz yetakchisi yuzma-yuz muloqotni “Muallim va Prezident oʻrtasida koʻprik, muhabbat va ishonch boʻlishi kerak”, degan jumla bilan boshlagani bizni ruhlantirib yubordi.

Yurtboshimiz bilan samimiy suhbatga kirishib ketganimizni hatto sezmay ham qoldik. Har birimiz koʻng­limizdagi barcha fikrlarimizni erkin ayta oldik.

Qashqadaryo tarixida birinchi boʻlib matematika fani chuqur oʻrgatiladigan sinf ochganman. Toʻgʻri, vaqtida qiyin­chilik va muammolar ham boʻlgan. Bugun yurtimizning har bir tumanida sinf emas, hatto ixtisoslashgan maktablar borligidan xursandligimni davlatimiz rahbariga maʼlum qildim. Bu esa uchinchi Renessans avlodlarining paydo boʻlishida katta qadam qoʻyilganidan dalolatdir.

Davlatimiz rahbari bilan suhbat jarayonida 90-yillarda oʻqituvchilar hayoti, faoliyati va maktablar bilan bogʻliq holatlar xususida toʻxtaldim. Ochigʻi, oʻsha paytda maktab­larda deyarli ayol oʻqituvchilar qolgandi.

Erkak oʻqituvchilar olayotgan maoshlari bilan oilani tebrata olmay, chet elga ish izlab ketganlari, ayollar oila yukini yelkalariga olib, yurtma-yurt sarson-sargardonlikda, olibsotarlik darajasiga tushib qolganlari, ayrimlari chet elga ketib, farzand­larini amma-xolaga, momo-buvaga, hattoki qoʻni-qoʻshniga tashlab ketganlarining guvohi boʻlganimni aytib, oʻqituvchi qaddi bukilganini soʻzlaganimda, Prezidentimiz ham oʻqituvchi saqich sotganlarini koʻrganlarini eslab oʻtdilar.

Natijada nima boʻldi? Tarbiyaga putur yetdi. Qarovsiz qolgan bolalar jinoyat qilishgacha borishdi. Yaxshiyamki, davlatimiz rahbari erkak oʻqituvchilarni maktabga qayt­­ardi. Maktab yana 11 yillikka aylantirildi. Eng asosiysi, oʻqituvchining obroʻyi va maoshi oshirildi. 2017-yili esa paxta dalasidan maktabga olib kelindi!

Muallimning gʻururi, qadri va qaddi tiklandi.

Muloqotdan barchamiz oʻzimizga tegish­li xulosa chiqardik. Endi biz “Insonga eʼtibor va sifatli taʼlim yili”da taʼlim tizimidagi barcha islohotlarni amalga oshirishda ikki, uch karra fidoyilik koʻrsatishimiz, oʻquvchilarimizga taʼlim va tarbiya berishda chuqur bilimga ega boʻlishimiz, ota-onalar bilan ishlashni yoʻlga qoʻyishimiz kerakligini chuqur angladik. Hammamiz mohir targʻibotchi boʻlib, oʻquvchi, ota-ona, mahalla, qisqasi, jamoatchilik bilan ishlashni yoʻlga qoʻyishimiz lozim. Avvalo, oʻzgarishni oʻzimizdan boshlashimiz kerak!

Bizni quvontirgan suhbat qariyb ikki soatga choʻzilganini hatto sezmay qoldik.

Prezidentimizning biz bilan oʻtkazgan oshkora va doʻstona suhbatlari unutilmas boʻldi. Yana bir bor qashqadaryolik pedagoglar nomidan sohaga alohida eʼtibor qaratayotganliklari, jamiyatda oʻqituvchi mavqeyini oshirish borasida amalga oshirilayotgan keng koʻlamli ishlari uchun Prezidentimizga chin dildan minnatdorlik bildiramiz.

Yangi Oʻzbekistonda muhtaram Prezidentimiz rahnamoligida taʼlimga, xususan, oʻqituvchi kasbiga juda katta eʼtibor va gʻamxoʻrlik koʻrsatilayotgan ekan, shak-shubhasiz, mamlakatimiz taraqqiyotga erishadi.

Muhabbat Sharapova,
Oʻzbekiston Qahramoni, xalq deputatlari
Qashqadaryo viloyat Kengashi deputati