Oʻz faoliyatingizdan qoniqasizmi?

Har bir sohada tahlil va tanqid samaradorlikni oshiradi. Bir qarashda oʻz faoliyatimizdan koʻnglimiz toʻlsa-da kamchiliklardan koʻz yuma olmaymiz. Ayni shu joyda oʻz oʻzini tanqid oʻrinli.

Oʻzbekiston “Adolat” SDP Andijon viloyati kengashining navbatdagi kengaytirilgan yigʻilishi oldiga shu masala qoʻyildi. Partiyaning hududiy kengash raislariga oʻz faoliyatingizdan qoniqasizmi, degan savol berildi. Birdan “ha” deya aytish qiyin. Bunday javobga munosiblar ham yoʻq emas.

Shu oʻrinda viloyat partiya kengashi faoliyatini koʻrsatuvchi raqamlarga toʻxtalsak: joriy yilning 9 oyi davomida mahalliy kengash sessiyalariga deputatlar tomonidan 101 ta masala kiritildi. Respublikada eng yuqori koʻrsatkich. Doimiy komissiyalarga kiritilgan masalalar 108 ta. Bu borada ham respublikada 2-oʻrin.

Partiya safiga yangi aʼzolar qabul qilish borasida olib borilayotgan ishlar avvalgi yillardagiga nisbatan qoniqarli. Yil boshida aʼzolar soni 32 ming 460 nafarni tashkil etgan boʻlsa, hozirda 35 ming 947 nafar.

Siyosiy Kengash tomonidan yuqoridagilar eʼtirof etildi. Andijonlik “adolatchilar”ga minnatdorchilik yuborildi. Bu partiyadoshlarimizni ruhlantirdi, yanada faol ish olib borishga boshladi.

Madaminjon Madazimov, “Adolat” SDP Andijon viloyat kengashi raisi:

-Albatta erishilgan yutuqlarda hududiy kengashlardagi faollarimizning munosib hissasi bor. Sessiya va doimiy komissiyalarga masala kiritishda deputatlar va partiya faollari birgalikda mavjud muammolarni oʻrganib bormoqda. Bu jamoatchilikni bizga boʻlgan ishonchini oshiryapti. Ayniqsa, Izboskan, Jalalquduq, Shahrixon, Ulugʻnor va Xoʻjaobod tuman kengashlari boshqalarga oʻrnak boʻlyapti. Bu ana shu hududlardagi yetakchilar oʻz ishiga masʼuliyat bilan qarab ish yuritayotganini koʻrsatadi.

Yutuqlar bilan birga ayrim kamchiliklar ham borki bu taʼkidlaganimizdek oʻzimizni tanqid qilishga chaqiradi.

Qosimjon Qayumov, “Adolat” SDP Andijon viloyat kengashi raisi oʻrinbosari:

-Aksariyat tuman kengashlari samarali faoliyat yuritayotgan bir vaqtda Andijon, Buloqboshi va Boʻston tuman kengashlarida yetarli ish tashkil etilmayotgani achinarli. Partiyaviy tadbirlarni oʻtkazish, elektorat bilan ishlash, partiya qanoti boʻlgan deputatlar bilan hamkorlikni kuchaytirish zarur. Qachonki yetakchi faol boʻlsa shunda natija boʻladi.  

Tanqidiy ruhda oʻtgan yigʻilish yakunida faoliyatida sustkashlikka yoʻl qoʻyganlarni samarali ishlashlari uchun koʻrsatma va maslahatlar berildi. Reyting nazorati tashkil qilinib, shu asosda baholash mexanizmi ishga tushirilishi aytildi.

Koʻrilgan masalalar yuzasidan tegishli qarorlar qabul qilinib, oldinda turgan vazifalar belgilab olindi.

“Adolat” SDP Andijon viloyat kengashi

Matbuot xizmati.