O‘zaro ishonch va birdamlik yanada kuchayadi

O‘zbekiston Respublikasi Prezidenti Shavkat Mirziyoyev Birlashgan Millatlar Tashkiloti Bosh Assambleyasining 78-sessiyasida ishtirok etib, tashqi siyosat, qo‘shni mamlakatlar bilan munosabatlar, xavfsizlik masalalarini qamrab olgan tashabbuslarni ilgari surdi.

Ta’kidlash joiz, xalqaro munosabatlar tizimida fundamental o‘zgarishlar yuz berayotgan bir paytda O‘zbekistonda “Inson qadri va manfaatlari uchun” degan ezgu g‘oya asosida majburiy va bolalar mehnatiga chek qo‘yildi, xalqimiz paxta qulligidan butkul ozod etildi, gender tenglikka bo‘lgan e’tibor yanada kuchaydi, xotin-qizlarning davlat boshqaruvidagi ulushi 35 foizga yetdi.

Izchil davom etayotgan islohotlar natijasi o‘laroq O‘zbekiston iqtisodiyoti, global tahdidlarga qaramasdan, barqaror o‘sish sur’atlarini namoyon etdi. So‘nggi olti yilda yalpi ichki mahsulot hajmi bir yarim martadan ortiq ko‘paydi. Mintaqa davlatlari o‘rtasida o‘zaro savdo ikki yarim barobardan ziyod, qo‘shma korxonalar soni esa besh marta o‘sdi.

Mintaqamiz iqtisodiy rivojlanish markaziga, Sharq va G‘arbni, Shimol va Janubni bog‘laydigan transport-kommunikatsiya ko‘prigiga aylandi. Xalqimizning turmush darajasini oshirishga qaratilgan siyosat tufayli mamlakatimizda 2017 yildan buyon kambag‘allik ikki barobarga kamaydi. Aholini ichimlik suvi, sog‘liqni saqlash, ta’lim va boshqa ijtimoiy xizmatlar bilan ta’minlash ko‘lami bir necha barobar oshdi. Orol dengizining qurigan tubida 1,7 million gektar maydonda qurg‘oqchilikka chidamli o‘simliklardan iborat yashil hududlar barpo etildi.

Darhaqiqat, keyingi 30 yilda mintaqamizda havo harorati bir yarim gradusga ko‘tarildi. Prezidentimiz ta’kidlaganidek, bu – dunyodagi o‘rtacha isishdan ikki karra ko‘pdir. Oqibatda muzliklar umumiy maydonining qariyb uchdan bir qismi yo‘qolib ketdi. Ushbu tendensiya saqlanib qolsa, yaqin yigirma yilda mintaqamizdagi ikkita yirik daryo – Amudaryo va Sirdaryo oqimi 15 foizga qisqarishi mumkin. Jon boshiga suv bilan ta’minlanish darajasi 25 foizga, qishloq xo‘jaligi ekinlari hosildorligi esa 40 foizga kamayishi kutilmoqda. Agar o‘z vaqtida ta’sirchan choralarni ko‘rmasak, ushbu muammolar oqibatlari mintaqamizdagi ijtimoiy-iqtisodiy barqarorlikka jiddiy putur yetkazadi.

Shu bilan birga, global xalqaro va mintaqaviy muammolarni bartaraf etish sohasida umumiy manfaatlarni mavjud ziddiyatlardan yuqori qo‘ygan holda hamjihatlik, jipslik bilan ko‘zlangan hamkorlik ishlarini o‘z vaqtida bajarishga erishish bo‘yicha muhim g‘oyalarni ilgari surdi.

Xususan, majburiy va bolalar mehnatiga qarshi kurashni butun dunyo miqyosida kuchaytirish, BMT huzurida Markaziy Osiyo yoshlarini rivojlantirishga ko‘maklashish bo‘yicha ishchi guruh tashkil etish, “Markaziy Osiyo yoshlarining kun tartibi – 2030” dasturini ishlab chiqish, “Markaziy Osiyo global iqlim tahdidlari qarshisida: umumiy farovonlik yo‘lida hamjihatlik” rezolyutsiyasini qabul qilish, BMT Bosh kotibining Suv resurslari bo‘yicha maxsus vakili lavozimini ta’sis etish hamda dunyo hamjamiyati Afg‘oniston muammosini hal etish yo‘lida birlashish kabi ilgari surilgan g‘oyalar shular jumlasidandir.

Bir so‘z bilan aytganda, Prezidentimiz tomonidan ilgari surilgan taklif va tashabbuslar, albatta, aholining farovon turmushiga, barchani tashvishga solayotgan jahondagi geosiyosiy va geoiqtisodiy masalalar, shuningdek, iqlim va suv resursalari muammolari konstruktiv va diplomatik yondashuv asosida o‘z vaqtida hal etilishiga xizmat qiladi.

Tavakkal CHORIYEV,

Oliy Majlis Qonunchilik palatasi deputati