Oʻzaro samarali munosabatlar yanada mustahkamlanmoqda

Oʻzbekiston Respublikasi Prezidenti Shavkat Mirziyoyev Qirgʻizistonga tashrif buyurar ekan eng avvalo, bir necha yillik qoʻshnichilik va qarindoshchilik munosabatlarini yanada mustahkamlanishini bot-bot taʼkidladi. Davlatimiz rahbari Qirgʻiziston Prezidenti va xalqini har doimgidek samimiy va iliq qabul qilganligi uchun minnatdorlik bildirdi. Bunday uchrashuv va munosabatlar kelgusidagi ishlarning rivojlanishida mustahkam poydevor boʻlishiga ishonchimiz komil. Uchrashuvda tomonlar koʻp tomonlama hamkorlikning muhim yoʻnalishlarini batafsil muhokama qilib, uni chuqurlashtirish boʻyicha aniq qarorlar qabul qilganligi qayd etildi.

Oʻzbekiston — Qirgʻiziston davlat chegarasining alohida uchastkalari toʻgʻrisidagi shartnoma tuzilgani ikki tomonlama munosabatlarda chinakam tarixiy voqea hisoblanib, ikki davlat xalqlarini ham birdek xursand qildi. Chunki bugungi kunda nafaqat tadbirkorlik sohasida balki, taʼlim sohasida ham, ikki davlatning bevosita hamkorlik qilayotgani hech birimizga sir emasdir.

Muzokaralar yakunida qabul qilingan muhim hujjatlardan biri keng qamrovli strategik sheriklik toʻgʻrisidagi deklaratsiya boʻldi. Bu, Davlatimiz rahbari qayd etganidek, mamlakatlarimiz va xalqlarimiz manfaatlari yoʻlidagi koʻp qirrali hamkorlik rivojida yangi davrning boshlanishi boʻlmoqda.

Darhaqiqat har bir davlatning savdo sotiq yoʻnalishlarini rivojlantirish muhim ahamiyatga ega ekanligini nazarda tutsak, ushbu sohani ham yanada takomillashtirish boʻyicha ham kelishuvlarga erishildi. Ikki mamlakat hukumatlari oldiga tovar ayirboshlashni, shu jumladan, importning oʻrnini faol toʻldirish va savdo markazlarini tashkil etish orqali ikki milliard dollarga yetkazish masalalari muhokama qilindi.

Sir emaski, tomonlar ikki mamlakat korxonalari va sarmoyadorlari ishtirokida energetika va kon tarmoqlarida, shu jumladan, koʻmir sanoatida yirik infratuzilmaviy loyihalarning amalga oshirilishidan manfaatdor.

Bu boradagi ishlarni tizimli asosda tashkil etish uchun kelgusida Oʻzbekiston — Qirgʻiziston taraqqiyot fondi kengaytiriladi, strategik savdo-iqtisodiy sheriklik boʻyicha 2023-2025 yillarga moʻljallangan kompleks dastur hamda sanoatning ustuvor yoʻnalishlarini rivojlantirish toʻgʻrisida bitim qabul qilindi.

Aytish joizki, bunday sherikchilik munosabatlari qoʻshni Qirgʻiziston davlati bilan mana necha yillardirki davom etib kelmoqda. Oʻylaymanki, ushbu manfaatli uchrashuv kelgusida oʻzining samarali natijalarini albatta, namoyon qiladi.

Muhiba Bababekova,
Xalq deputatlari Samarqand shahar Kengashi deputati.