“Oʻzbekiston — 2030” strategiyasi yoshlarga oʻzgacha ruh bagʻishladi

“Adolat” SDPning Saylovoldi dasturida yoshlarni har tomonlama qoʻllab-quvvatlash, yosh avlodning huquq va manfaatlarini himoya qilish, yoshlarning eng dolzarb muammolarini faol va samarali yechish, ularga har tomonlama yordam koʻrsatish, yoshlar tashkilotlari faoliyati samaradorligini oshirish, kelajak avlodning turmushi va taʼlim olish sharoitlarini yaxshilashga oid aniq vazifalar, maqsadlar belgilab olingan. Ahamiyatlisi, joriy yilning 11-sentyabr kuni davlatimiz rahbarining farmoni bilan tasdiqlangan “Oʻzbekiston – 2030” strategiyasi va unda ilgari surilayotgan maqsad va vazifalarda mamlakatimiz rivoji va xalqimiz farovonligini taʼminlashga qaratilgan bir qancha muhim yoʻnalishlar qatorida yoshlar masalasiga ham katta eʼtibor qaratilgani partiyaning oʻz oldiga belgilab olgan maqsad va vazifalarini toʻlaqonli roʻyobga chiqarishda yangi imkoniyatlarni yaratib berdi.

Shu boisdan mamlakatimizda “Inson qadri uchun”, degan ezgu tamoyil asosida “Oʻzbekiston — 2030” strategiyasida ilgari surilgan yoshlarga oid masalalarni keng jamoatchilikka, ayniqsa, yoshlarga yetkazish maqsadida bugun partiya Siyosiy Kengashi Markaziy apparati tashabbusi bilan poytaxtimizda joylashgan Toshkent davlat transport universitetida “Oʻzbekiston — 2030” strategiyasida yoshlar masalasi” mavzusida tadbir oʻtkazildi.

Unda Oʻzbekiston Respublikasi Oliy Majlis Qonunchilik palatasi deputatlari, partiya Siyosiy Kengashi Markaziy apparati xodimlari, Toshkent davlat transport universiteti professor-oʻqituvchilari va talabalari, partiyaning “Yosh adolatchilar qanoti” faollari, “Yoshlar parlamenti” aʼzolari, shuningdek, ommaviy axborot vositalari vakillari ishtirok etishdi.

Tadbirda soʻz olganlar tomonidan “Oʻzbekiston — 2030” strategiyasi toʻgʻrisidagi Oʻzbekiston Respublikasi Prezidentining PF-158-sonli Farmonining mazmun-mohiyati, Strategiyasida aks etgan yoshlarga oid masalalar hamda kelgusida ushbu muhim hujjatning ijrosi natijasida erishiladigan yutuqlar, mamlakatimizda soʻngi yillarda amalga oshirilayotgan islohotlar yuzasidan maʼlumotlar berildi.

Jarayonda, mazkur strategiya mamlakatimizda, taʼlim sifatini oshirish, yoshlarimizni har jihatdan barkamol qilib tarbiyalash yoʻlidagi boshlangan islohotlarimizni yangi bosqichga olib chiquvchi haqiqiy, puxta ishlangan, dasturilamal ekanligi taʼkidlandi.

Yakunda partiya faollari, barcha darajadagi deputatlar, shuningdek, “Yoshlar parlamenti” aʼzolari bilan birgalikda partiyaning dasturiy-maqsadlariga hamohang ushbu Strategiyani toʻlaqonli amaliyotga tatbiq etish jarayonlarida nafaqat faol ishtirokchi, balki ilgʻor, tashabbuskor tashkilotchilardan boʻlishga kelishib olindi va kelgusidagi ustuvor vazifalar belgilandi.

“Adolat” SDP
Matbuot xizmati