“Oʻzbekiston – 2030” strategiyasining 2023-yilga moʻljallangan amaliy tadbirlar rejasi amalda

Oʻzbekiston Respublikasi Prezidentining 2023-yil 11-sentabrdagi PQ-300-son qarori bilan tasdiqlangan “Oʻzbekiston – 2030” strategiyasining 2023-yilga moʻljallangan amaliy tadbirlar rejasining 6-bandida umumiy oʻrta taʼlim muassasalarida yuqori sinf oʻquvchilarining qobiliyati va tanlovi asosida maktablarda tayanch oʻquv rejasi ishlab chiqish belgilab qoʻyilgan. Unga koʻra, amaldagi mavjud sinflarda kimyo–biologiya, fizika–matematika, ona tili–chet tili, matematika–chet tili yoʻnalishida oʻquv-rejasini ishlab chiqish va amaliyotga joriy etish vazifalari yuklatilgan. Shuningdek, 2023-2024 oʻquv yilida umumiy oʻrta taʼlim maktablarida tajriba-sinov tariqasida tanlov fanlarini joriy etilganligini jamoatchilik nazorati tartibida oʻrganish maqsadida Oʻzbekiston “Adolat” SDP Fargʻona viloyat Kengashi raisi Shahnoza Gʻaniyeva, Fargʻona shahar Kengashi deputati B.Axmadaliyev va soha mutaxassislaridan iborat ishchi guruh Fargʻona shahridagi 5,13- umumiy oʻrta taʼlim maktablarida olib borilayotgan ishlarni atroflicha oʻrgandilar.

Fargʻona shahridagi 5-oʻrta taʼlim maktabida 76 nafar 10- sinf oʻquvchilari oʻrtasida oʻtkazilgan soʻrovnoma asosida 26 nafar oʻquvchilar tanlab olindi. 10-“B” sinfida tayanch oʻquv dasturi asosida tabiiy fan yoʻnalishida tahsil olayotgan oʻquvchilar alohida dastur asosida oʻqitilmoqda. Oliy taʼlim, fan va innovatsiyalar vazirligi hamda Taʼlimni rivojlantirish respublika ilmiy-metodik markazi tomonidan kimyo-biologiya fanidan oʻquvchilarga taʼlim berayotgan oʻqituvchilar uchun maxsus elektron dastur yetkazib berilgan. Maktabda tabiiy fanlar yoʻnalishi boʻyicha tayanch oʻquv dasturini amalda tatbiq etish uchun barcha sharoitlar yetarli boʻlib, laboratoriya jihozlari bilan taʼminlangan.

Pedagoglar orasidan saralab olingan eng mahoratli va izlanuvchan pedagoglar Yoqutxon Xalilova, Muxlisa Alijonova, Gulchehra Erkaboeva, Venera Staxanchik, Navroʻzbek Muratov, Sherzod Rahmonqulov kabi fidoiylar oʻquvchilarga bilim berishmoqda.

Tashkil etilgan ushbu tayanch oʻquv dasturida oʻquvchilarga har bir mavzuni mukammal oʻrganishlari uchun yetarlicha vaqt berilganligi eʼtirofga sazovor. Ular har bir mavzu yuzasidan batafsil maʼlumotlar olayotganliklari darslarga qiziqishlarini oshirmoqda. Shuningdek, darsliklarga hamohang tarzda qoʻshimcha adabiyotlardan foydalanib darslar tashkil etilayotganligi sababli oʻquvchilarimiz darslarga toʻlaqonli qiziqish bildirishmoqda. — Oʻzlashtirishlar ham aʼlo darajada, deydi ustozlardan biri Muxlisa Alijonova. — Biroq, tayanch oʻquv dasturi asosida darsliklar yoʻqligi biroz qiyinchiliklar tugʻdirmoqda. Lekin shunga qaramay astoydil izlanib, ijodkorlik bilan mashgʻulotlarni olib bormoqdamiz. Maqsadimiz yagona — davlatimiz biz pedagoglarga bildirayotgan ishonchni oqlaymiz va har jihatdan zukko oʻquvchilarni tarbiyalashga harakat qilamiz.

Oʻquv mashgʻulotlarini kuzatar ekanmiz, darslarga loqaydlik bilan oʻtirgan birorta oʻquvchini koʻrmadik. Demak, “Oʻzbekiston -2030” harakatlar strategiyasida yosh-avlod taʼlim tarbiyasiga qaratilgan maqsadlar kelajakda kutilgan natijalarni berishiga ishonchimiz komil.

                          Bunyod Axmadaliev,

Fargʻona shahar Kengashi deputati.