Oʻzbekiston “Adolat” SDP Fargʻona viloyat Kengashining navbatdan tashqari X konferensiyasi boʻlib oʻtdi

Unda shahar va tuman partiya tashkilotlari konferensiyalaridan delegat sifatida saylangan partiya faollari, faxriylari hamda OAV vakillari ishtirok etdilar.

Bugun xalqimiz yana bir tarixiy jarayon bilan yuzlashmoqda. Hamjihatlik va birdamlikda yangi Oʻzbekistonning yangi Konstitutsiyasini umumxalq Referendumi orqali qabul qildik. Yangi Konstitutsiyamizda xalqning qadr-qimmatini yuksak pogʻonalarga koʻtarilganligi, fuqarolarning huquq va manfaatlari qonuniy muhofaza qilinishi barchani quvontiradi. Mana shunday quvonchli kunlarning davomi sifatida muddatidan avval Prezidentlik saylovining oʻtkazilishi ham har birimizdan yuksak masʼuliyatni talab etadi,- deydi “Adolat” SDP Fargʻona viloyat Kengashi raisi Sh.Gʻaniyeva. — Yangi tahrirdagi Oʻzbekiston Respublikasi Konstitutsiyasi kuchga kirishi bilan davlatimizda demokratik islohotlar yanada jadallashganligini, bu siyosiy jarayonlarda siyosiy partiyalarning faol ishtirokini his qilib turibmiz. Bu islohotlarda “Adolat” SDP atrofida birlashgan sizu biz ham Prezidentlik saylovlarida faol ishtirok etishimiz zarur.

Shundan soʻng konferensiya ishtirokchilariga Toshkent shahrida boʻlib oʻtadigan Qurultoyda ishtirok etish uchun koʻrsatilgan delegatlarning tarjimai xoli va mehnat faoliyati toʻgʻrisida maʼlumot berib oʻtildi.Ishtirokchilarning ovoz berish natijalariga koʻra saylangan delegatlar tarkibi tasdiqlandi. Qizgʻin muhokamalardan soʻng partiya aʼzolari va faollarining 5 nafari delegat etib saylandi.

Shu asnoda delegatlar 2023 yil 29-may kuni Toshkent shahrida boʻlib oʻtadigan “Adolat” sotsial-demokratik partiyasining XI Qurultoyida ishtirok etish huquqini qoʻlga kiritdi.

Konferensiyada koʻrilgan masalalar yuzasidan tegishli qaror qabul qilindi.

“Adolat” SDP Fargʻona viloyat kengashi Matbuot xizmati.