O‘zbekiston mustaqilligining 32 yilligi: “Yoshlar huquqlarining kafolatlari” mavzusida davra suhbati bo‘lib o‘tdi

Bugungi kunda yoshlarni har tomonlama qo‘llab-quvvatlash davlat ahamiyatiga molik ustuvor masala bo‘lib qolmoqda. Yoshlarning ijtimoiy va siyosiy faolligini oshirish, huquqiy ongini yuksaltirish, bandligini taʼminlash va tadbirkorlikka jalb etish, iqtidorini rivojlantirish, axborot xurujlari va nosog‘lom muhitdan himoya qilish — bular yurtimizdagi yoshlarga oid davlat siyosatining muhim yo‘nalishlaridan biridir.

Mana shunday masalalar ijrosini taʼminlash, yoshlarimizni har tomonlama barkamol etib tarbiyalash maqsadida bugun Islom Karimov nomidagi Toshkent Davlat texnika universiteti huzuridagi O‘zbekiston Yaponiya yoshlar innovatsiya markazi majlislar zalida O‘zbekiston “Adolat” SDP Siyosiy Kengashi Markaziy apparati, partiyaning Oliy Majlis Qonunchilik palatasi huzuridagi Yoshlar parlamenti aʼzolari, O‘zbekiston “Adolat” SDP “Yosh adolatchilar” qanoti Respublika Kengashi bilan hamkorlikda “O‘zbekiston mustaqilligining 32 yilligi: Yoshlar huquqlarining kafolatlari” mavzusidagi davra suhbati bo‘lib o‘tdi.

Tadbirda O‘zbekiston “Adolat” SDP Siyosiy Kengashi Markaziy apparati, O‘zbekiston “Adolat” SDPning Oliy Majlis Qonunchilik palatasi huzuridagi “Yoshlar parlamenti”dagi aʼzolari, partiya faollari hamda OAVlar vakillari ishtirok etishdi.

“Adolat” SDP fraksiyasi rahbari, O‘zbekiston Respublikasi Oliy Majlisi Qonunchilik palatasi Spikerining o‘rinbosari Ibragimova Zuhra Ametovna, O‘zbekiston “Adolat” SDP Siyosiy Kengashi raisi Bahrom Abdurahimovich, O‘zbekiston “Adolat” SDPning Oliy Majlisi Qonunchilik palatasi huzuridagi “Yoshlar parlamenti”dagi siyosiy guruhi rahbari, yu.yu.f.d. Teshaboyev Akbarshohlar moderatorligi ostida o‘tgan mazkur tadbirda partiya Kengash raislari, siyosatshunos olimlar hamda yoshlar parlamentining bir qator aʼzolari o‘z maʼruzalari bilan ishtirok etishdi.

Jumladan, O‘zbekiston Respublikasi Oliy Majlisi Qonunchilik palatasi deputati, partiyaning “Yosh adolatchilar” qanoti Respublika Kengashi raisi Muhammad Valiyev o‘zining “Yangi O‘zbekistonda yoshlarga oid davlat siyosatining mazmun-mohiyati” borasida qilgan maʼruzasi davomida bugungi yoshlarning intellektual salohiyati ertangi kun uchun jamiyat taraqqiyotida muhim ahamiyat kasb etishi, davlatimizning jahon hamjamiyati orasida tutgan o‘rnini belgilab beruvchi eng muhim omillardan biri bo‘lishini alohida taʼkidlab o‘tdi.

Shuningdek, tadbir davomida – Yoshlar ishlari agentligi bo‘lim boshlig‘i Akmal Alimovning “O‘zbekistonda yoshlarning ijtimoiy-siyosiy huquqlarining taʼminlanishi” borasida qilgan maʼruzasi o‘ziga xos yondashuv va qarashlarga boy ekanligi bilan yig‘ilganlarda katta taassurot uyg‘otdi. Toshkent davlat yuridik universiteti katta o‘qituvchisi, AQSHda tadqiqot o‘tab qaytgan yosh olim Xurshid Botirovning “Xorijiy davlatlardagi yoshlarning davlat tomonidan qo‘llab-quvvatlanishi” borasidagi maʼruzasi tadbir ishtirokchilari tomonidan qizg‘in muhokama qilindi.

Parlament axborot markazi xodimi, Siyosatshunos olim G‘olibjon Muhammadjonovning “O‘zbekistonda yosh olimlarni qo‘llab-quvvatlash borasida amalga oshirilayotgan islohotlar” borasida qilgan maʼruzasi orqali tadbir ishtirokchilari orasida kelajakda o‘z ilmiy faoliyatini davom ettirish niyatida bo‘lgan yoshlar o‘zlari uchun kerakli bo‘lgan ko‘plab qimmatli maʼlumotlarga ega bo‘ldilar.

Maʼruzalar, muhokamalar, bahs va munozaralarga boy tarzda o‘tgan tadbir so‘ngida xalqimiz sevgan sanʼatkorlar o‘zlarining kuy va qo‘shiqlari bilan yig‘ilganlarga ko‘tarinki rux baxsh etishdi. Mustaqilligimizning 32 yillik shodiyonalari arafasida tashkil etilgan mazkur tadbir chin maʼnoda bayram shukuhiga boy bo‘ldi.

“Adolat” SDP Matbuot xizmati.