O‘zbekiston - Ozarbayjon: do‘stlik aloqalari yanada mustahkamlanib, yuksak natijalarga erishilmoqda

Ozarbayjon O‘zbekiston Respublikasini dunyo xaritasidagi mustaqil davlat sifatida tan olgan ilk mamlakatlardan biri sanaladi. Bu yil ikki davlat o‘rtasida do‘stlik aloqalari o‘rnatilganligiga o‘ttiz yildan oshdi.

O‘tgan vaqt davomida O‘zbekiston va Ozarbayjon o‘rtasida tarixan shakllangan yaqin do‘stona munosabatlar jadal rivojlanib bordi. 2017 yildan keyin oliy darajadagi muloqotlar faollashib, o‘zaro delegatsiyalar almashinuvi kuchaydi. Bu borada esa ikki mamlakat yetakchilari tomonidan ilgari surilayotgan tashabbuslar muhim ahamiyat kasb etmoqda.  

Buni O‘zbekiston va Ozarbayjon BMTning xalqaro kun tartibidagi asosiy masalalar, jumladan, xavfsizlikka zamonaviy tahdid va xavf-xatarlarga qarshi kurashish, yadro qurolini tarqatmaslik rejimini mustahkamlash, inson huquqlari himoyasi, Barqaror rivojlanish maqsadlarini amalga oshirish va boshqa yo‘nalishlar bo‘yicha o‘xshash nuqtai nazarlarga egaligida ham ko‘rishimiz mumkin.  

Jumladan, Ozarbayjon O‘zbekiston tashabbusi bilan Markaziy Osiyoda hamkorlikni mustahkamlash (2018), diniy bag‘rikenglik (2018), sayyohlikni rivojlantirish (2019), Orolbo‘yi mintaqasini ekologik innovatsiyalar va texnologiyalar zonasi deb e’lon qilish (2021), Markaziy va Janubiy Osiyo o‘rtasidagi o‘zaro bog‘liqlikni mustahkamlash (2022), Barqaror rivojlanish maqsadlariga erishishni jadallashtirishda parlamentlarning rolini kuchaytirish (2022) bo‘yicha qabul qilingan rezolyutsiyalarni qo‘llab-quvvatladi va hammuallif bo‘ldi.  

Shuningdek, ayni kunda mamlakatimizda Ozarbayjon kapitali ishtirokida 203 ta korxona faoliyat ko‘rsatmoqda, ulardan 66 tasi qo‘shma korxona va 137 tasi 100 foiz Ozarbayjon kapitali ishtirokida tashkil etilgan korxonalardir. 2023 yil fevral oyida O‘zbekiston va Ozarbayjon ustav kapitali 500 million dollar bo‘lgan Investitsiya jamg‘armasini tashkil etdi.  

Davlatimiz rahbarining 22-23 avgust kunlari Ozarbayjonga qilgan navbatdagi tashrifi ushbu boshlangan islohotlarni yangi bosqichga olib chiqish yo‘lida keng imkoniyatlarni ochib berishga qaratilganligi bilan yanada ahamiyatlidir. Jumladan, O‘zbekiston Respublikasi Prezidenti Shavkat Mirziyoyev va Ozarbayjon Respublikasi Prezidenti Ilhom Aliyevning tor doiradagi uchrashuvi davomida tomonlar energetika, mashinasozlik, metallurgiya, shaharsozlik, qishloq xo‘jaligi, foydali qazilmalar, to‘qimachilik, ipakchilik, farmatsevtika, elektrotexnika va boshqa tarmoqlarda sanoat kooperatsiyasini kengaytirish istiqbollarini muhokama qildilar.  

Kengaytirilgan tartibda bo‘lib o‘tgan muloqot davomida O‘zbekiston-Ozarbayjon strategik sheriklik munosabatlarini yanada chuqurlashtirish, ko‘p qirrali hamkorlikni avvalo siyosiy, savdo-iqtisodiy, transport-kommunikatsiyaviy va madaniy-gumanitar sohalarda rivojlantirish masalalariga to‘xtalib o‘tildi.  

Yakunda davlatlar, hukumatlar va idoralar darajasida 15 ta hujjat qabul qilindi. 2023-2024 yillarda har tomonlama strategik sheriklikni chuqurlashtirish bo‘yicha “yo‘l xaritasi”, energetika, yoshlarga oid siyosat va sport sohalaridagi hamkorlik to‘g‘risidagi bitimlar, Media bo‘yicha hamkorlikni rivojlantirishda “yo‘l xaritasi” shular jumlasidandir.  

Bundan tashqari, fuqarolarning vizasiz qatnovlari to‘g‘risidagi bitimga o‘zgartirish va qo‘shimchalar kiritildi, “Ye-permit” ruxsatnoma blanklarini elektron almashish axborot tizimini joriy etish, oila va bolalarni muhofaza qilish, oziq-ovqat xavfsizligi borasida hamkorlik bo‘yicha kelishuvlarga erishildi hamda Xavfsizlik kengashlari kotibiyatlari o‘rtasidagi, kiberxavfsizlik sohasida memorandumlar imzolandi.  

Bir so‘z bilan aytganda, ikki kunlik tashrif doirasida imzolangan ushbu hujjatlar O‘zbekiston va Ozarbayjon o‘rtasidagi do‘stona munosabatlarni kengaytirishga xizmat qiladi. Shu bilan birga, ikki qardosh xalq farovonligi yo‘lida o‘zaro hamkorlik, madaniy almashinuv do‘stlik aloqalarini mustahkamlashda yuksak natijalarga erishishning yangi ufqlarini ochib beradi.  

Oltinoy MAMIROVA,  

Oliy Majlis Qonunchilik palatasi deputati.