Oʻzbekiston tinchligi va taraqqiyoti yoʻlida birlashaylik!

Respublika shoshilinch tibbiy yordam ilmiy markazi Fargʻona filiali majlislar zalida markaz rahbariyati, shifokorlar va hamshiralar ishtirokida “Oʻzbekiston tinchligi va taraqqiyoti yoʻlida birlashaylik!”mavzusida ijtimoiy –siyosiy tadbir tashkil etildi.

Dastlab, Oʻzbekiston Respublikasi Prezidenti Shavkat Mirziyoyevning joriy yilning 19-sentyabr kuni Nyu-York shahridagi Birlashgan Millatlar Tashkiloti bosh qarorgohida BMT Bosh Assambleyasi 78-sessiyasida soʻzlagan nutqi namoyish etildi.

Prezidentimiz Shavkat Mirziyoyev oʻz nutqida diyorimiz jahon ilm-fani rivojiga beqiyos hissa qoʻshgan, islomni ilm-maʼrifat va tinchlik dini sifatida namoyon etgan Al-Xorazmiy, Beruniy, Ibn Sino, Imom Buxoriy, Mirzo Ulugʻbek, Alisher Navoiy singari ulugʻ alloma va mutafakkirlar vatani ekani bilan haqli ravishda faxrlanamiz,–deya taʼkidladi.

Shunday buyuk olimlarning boy merosini oʻrganish, islomning asl insonparvarlik mohiyatini chuqur ochib berish maqsadida 2024-yil Oʻzbekistonda “Islom – tinchlik va ezgulik dini” mavzusida xalqaro konferensiya oʻtkazish tashabbusi ilgari surildi.

Soʻzining yakunida davlatimiz rahbari barchamiz hozirgi tarixiy tub burilish pallasida kelgusi avlodlarga sayyoramizni qanday holda qoldirish haqida oʻylashimiz lozimligini qayd etdi: “Mustahkam tinchlik va farovonlikka faqat umumiy intilishlar va birgalikdagi harakatlar bilan erishish mumkin. Bizga oʻzaro ishonch, birdamlik va hamkorlik ruhi har qachongidan ham koʻproq zarur”.

Oʻzbekiston Birlashgan Millatlar Tashkiloti institutlari va barcha davlatlar bilan keng koʻlamli va uzoq muddatli sheriklikni chuqurlashtirishga tayyor ekanini yana bir bor taʼkidlandi.

Filialda shu kuni Oʻzbekiston Adolat SDP Fargʻona shahar Kengashi raisi Shahnoza Ahmedova tashabbusi bilan partiyaning “Tinchlik, farovonlik yoʻlida birlashaylik!” loyihasi doirasida tadbir tashkil etildi. Tadbirda Din ishlari boʻyicha qoʻmitaning Fargʻona viloyat hududiy boshqarmasi bosh mutaxassislari Ilhomjon Mirzaahmedov, Dilorom Gʻofurovalar tomonidan missionerlik, ayollar oʻrtasida diniy mutaassiblikka berilib qolish, taqlidiy libos, yaʼni hijob kiyish, noqonuniy diniy saboq olish uchun chet davlatlariga chiqib ketishning oldini olish mavzusida fikr yuritildi.

Tadbirda har bir inson eng avvalo, dunyoviy bilimni puxta egallashlari muhim omil ekanligi, bu ham boʻlsa har bir insonning jamiyatda oʻzi va kelajakda farzandlarining taʼlim- tarbiyasida muhim ahamiyat kasb etishi haqida soʻz yuritildi.

Tadbir davomida “Tinchlik qadri” nomli film namoyish etildi.

“Adolat” SDP

Fargʻona viloyat kengashi Matbuot xizmati.