Oʻzbekiston  yuksalish yo'lida

Bosh Qomusimizga kiritilayotgan oʻzgartishlarning mazmun-mohiyatini fuqarolarimizga tushuntirib borish borasida tashkillashtirilayotgan targʻibot tadbirlari Samarqand viloyatining turli hududlarida oʻtkazilib kelinmoqda. Jumladan Samarqand tumanida joylashgan Qoʻsh koʻprik mahalla fuqarolarida ham tashkillashtirildi. Yigʻilishda “Adolat” sotsial demokratik partiyasidan saylangan deputatlar, mahalla raisi, partiya faollari va mahalla xotin qizlari ishtirok etishdi.

Uchrashuvlarda taʼkidlanganidek, soʻnggi yillarda jamiyatimiz hayotining barcha jabhalarida tub oʻzgarishlar boʻlyapti. Manzilli ijtimoiy himoya tizimi yaratildi, iqtisodiyot erkinlashib, xususiy mulk egalari koʻpayib boryapti, madaniy hayotimizda, sport sohasida yoshlarimizning yutuqlari kundan-kunga oshib boryapti, parlamentarizm va sud-huquq sohasida ham demokratik oʻzgarishlar qilinyapti. Xalqimizni qarashlari oʻzgarib, huquqiy ongi oshib boryapti, davlat organlari ustidan taʼsirchan jamoatchilik nazorati olib borilyapti.Bundan tashqari, naqd pul, valyuta muammolari hal qilindi, qoʻshni mamlakatlar bilan oramizdagi munosabatlar yaxshilandi va hokazo yana boshqa ishlarni sanab oʻtish mumkin. Bu yutuqlar, huquq va erkinliklardan nafaqat hozirgi, balki kelajak avlodlarimiz ham emin-erkin foydalanishi uchun, ularni, albatta, Konstitutsiyada muhrlab qoʻyish lozim. Konstitutsiyamiz zamondan orqada qolib ketmasagina, u shiddat bilan olib borilayotgan islohotlarimizning Bosh huquqiy asosi boʻlib xizmat qila oladi, tinch va osuda hayotimizning kafolati boʻla oladi.

Shuningdek, mamlakatimiz har jihatdan katta davlatga aylanmoqda. Aholimiz 2040 yilga borib 50 millionga yetadi, jamiyatning yarmidan koʻpini yoshlar tashkil qiladi. Ularga munosib hayot sharoiti yaratish uchun esa barqaror iqtisodiyot, xavfsiz davlat, samarali boshqaruv, ijtimoiy kafolatlar boʻlishi lozim.Bular va boshqa koʻpdan-koʻp muammolar yechimi mustahkam huquqiy poydevorni – Oʻzbekistonning yangi tahrirdagi Konstitutsiyasini taqozo etadi. Aynan shuning uchun ham yurtimizda Konstitutsiyaviy islohotlar olib borilmoqda.

Tadbirda soʻzga chiqqanlar, mamlakatimizda olib borilayotgan islohotlarni qoʻllab-quvvatlashlarini hamda xalqimiz taqdiri va ertangi kunini belgilab beradigan tarixiy Qonunga befarq boʻlmasdan, albatta referendumda faol ishtirok etishlarini maʼlum qilishdi.

Sanobar Mirsaidova,

Xalq deputatlari Samarqand viloyati Kengashi deputati.