Ochiq osmon ostida tashkillashtirilgan navbatdagi targ’ibot tadbiri

O‘zbekiston “Adolat” sotsial demokratik partiyasi tomonidan Samarqand viloyat Pastdarg’om tumanining “Bobur” mahalla fuqarolari yig’inida joylashgan 12- maktabining yozgi sport maydonida ochiq osmon ostida yangi tahrirdagi Konstitutsiya mazmun-mohiyatini keng jamoatchilik vakillariga tushuntirishga bag‘ishlangan targ‘ibot tadbiri o‘tkazildi.
“Yangi Konstitutsiya xalq uchun inson uchun” mavzusida tashkil etilgan mazkur tadbirda partiyaning Pastdarg’om tuman Kengashi, Oliy Majlis Qonunchilik palatasi deputati Muzaffara Abdiyeva, tuman Kengashlariga partiyadan saylangan deputatlar, jamoatchilik faollari, turli soha vakillari ishtirok etdi.
Targ’ibot tadbiri davomida Oliy Majlis Qonunchilik palatasi deputati Muzaffara Abdiyeva so‘zga chiqib, yangilanayotgan Konstitutsiyamiz jamiyatimizda yangicha, ilg‘or siyosiy ma’rifatning yuzaga kelishiga ham xizmat qilishini ta’kidladi. Yangi tahrirdagi Konstitutsiya mamlakatimizda ijtimoiy, demokratik-huquqiy va chinakam xalqparvar davlatchilik sari tashlanayotgan dadil qadamlar uchun mustahkam asos vazifasini o‘taydi. Chunki unda aholi farovonligini oshirish, inson huquq va manfaatlari, qadr-qimmatini yanada yuksaltirish, hayotning barcha sohalarini rivojlantirish bo‘yicha huquqiy kafolatlar mustahkamlanmoqda.
Shu bilan birgalikda xalqaro va xorijiy davlatlarning tajribasi inobatga olinib, ekspert va mutaxassislar, eng asosiysi xalqimizning takliflari asosida ishlab chiqilgan yangi tahrirdagi Qomusimizda O‘zbekiston ijtimoiy davlat, deb belgilangani inson qadrini yuksaltirishning poydevori yanada mustahkamlanayotganidan dalolat beradi. Davlatlatimiz kambag‘allikni qisqartirish, bandlikni ta’minlash, ishsizlikdan himoya qilish bo‘yicha qator yangi majburiyatlarni olishi belgilanmoqda. Yosh yovlodga bilim berishdek mas’uliyatli va mashaqqatli kasb egalari o‘qituvchilarning sha’ni, qadr-qimmati davlat himoyasiga olinishini ham alohida ta'kidlab o'tildi.
Ko‘tarinki kayfiyatda o‘tgan tadbirda Konstitutsiyaga kiritilayotgan yangi normalar haqida batafsil tushunchalar berildi. So‘zga chiqqan mahalliy Kengash deputatlari, hududdagi faollar ham Konstitutsiyamizdagi yangi me’yor va qoidalar xalqimizga manzur bo‘layotgani, mehnat jamoalari, mahallalardagi uchrashuv va muloqot jarayonlarida xalqimiz tomonidan qo‘llab-quvvatlanayotganini bildirishdi.
Tadbirda faol ishtirok etgan har bir fuqaro va tadbir qatnashchisi nafaqat o’zining balki farzandlarining ham kelajagiga befarq bo‘lmasligi hamda 30 aprel kuni bo‘lib o‘tadigan referendumda faol ishtirok etishga chaqirildi.

Xonbuvi Xayitova,
“Adolat”SDP Pastdarg’om tuman Kengashi raisi.