Oila tinch-el tinch

Oila muqaddas qoʻrgʻon. Uni asrab –avaylasakkina jamiyat birdamligi, vatan ravnaqi yoʻlidagi harakatlarimiz oʻz samarasini beradi. Xalq deputatlari Qoʻshtepa tuman Kengashi deputati Dilrabo Uzaqova oilaviy ajrimlarni oldini olish, qaynona-kelin munosabatlarini yaxshilash, mustaqil hayot ostonasiga kirib kelayotgan yigit-qizlarni turmushga tayyorlash borasida mahalla nuroniylari bilan yuzma –yuz muloqotlar oʻtkazib turadi. Qaysi xonadondagi kelinchakka hunarli boʻlishiga koʻmaklashish kerag-u, qaysi xonadondagi qaynona –kelin munosabatlari darz ketgan, qaysi oilaning farzandi taʼlim tarbiyasi izdan chiqib ketgan-u unga huquqiy maʼnaviy koʻmak zarur? Deputat turli muammolarni hal etish barobarida oilaviy munosabatlarni mustahkamlashga ham oʻz hissasini qoʻshib kelmoqda.

-Har kuni oʻnlab oilalarga kiraman, yuzlab fuqarolar bilan uchrashaman.Oʻtgan davr mobaynida koʻplab oilalarni ajrimini oldini olishga erishdik. Oʻndan ziyod oilalarni qayta tiklab, farzandlariga bagʻri butunlikni hadya etdik. Kuyovni ishga joyladik, kelinni kasb–korni oʻrganishi uchun tikuvchiga shogirdlikka joylashtirdik. 2-3 yoshli bolalari hududdagi maktabgacha taʼlim tashkilotiga joylashtirildi. Bugungi kunimiz ham besamar oʻtmadi. Darz ketayotgan bir oila garchi qiyinchilik bilan boʻlsa-da asrab qolindi, — deydi Dilrabo Uzaqova.

Qushning ham ini buzilmasin deydi dono xalqimiz. Oila muqaddas qoʻrgʻon. Bu qoʻrgʻon mustahkamligi yoʻlida barchamiz birdek masʼul boʻlsak, jamiyatda totuvlik taʼminlanadi, oilaviy ajrimlar tufayli aziyat chekayotgan bolalar koʻzida koʻz yosh emas, hamisha quvonch nurlari charaqlab turadi.

 “Adolat” SDP

Farg’ona viloyat kengashi Matbuot xizmati.