Oldimizda katta vazifalar turibdi

Ortda qolgan 2022 yilda barcha sohalarda erishilgan yutuqlarga nazar tashlarkanmiz, Yangi O‘zbekistonning Taraqqiyot strategiyasi doirasida mamlakatimizda amalga oshirilayotgan tub islohotlarning asosiy maqsadi oliy qadriyat – inson manfaatlari to‘la ro‘yobga chiqarilishiga qaratilayotgani ayonlashadi.

O‘tgan 2022 yil Oliy Majlis Qonunchilik palatasining Yoshlar masalalari bo‘yicha komissiyasi uchun ham samarali yil bo‘ldi. Hisobot yilida Komissiya o‘z oldiga qo‘ygan vazifalarni qunt bilan bajardi, desam mubolag'a bo'lmaydi.

Xususan, o‘z faoliyatida 5 ta asosiy yo‘nalishga ustuvor vazifa sifatida qaragan holda, faoliyat olib bordi. Qonun ijodkorligi, nazorat-tahlil tadbirlari, amaliy tadbirlar va targ‘ibot, xalqaro hamkorlik, OAVlarda komissiya faoliyatini yoritib borish shular jumlasidan.

Shuningdek, hisobot davrida Komisssiya tomonidan Qonunchilik palatasining qo‘mitalari bilan hamkorlikda mamlakatimizda yoshlarga oid davlat siyosatini samarali amalga oshirish, yoshlarni har tomonlama qo‘llab-quvvatlashga qaratilgan ishlarning borishi o‘rganilib, tahlil qilish maqsadida 9 ta nazorat-tahlil tadbiri o‘tkazildi.

Uch marotaba qonun va qonunosti hujjatlarining ijro etilishi holati joylarga chiqqan holda o‘rganilgan bo‘lsa, yana shuncha marotaba Komissiya va qo‘mitalarning qo‘shma yig‘ilishlarida davlat hokimiyat va boshqaruvi organlari rahbarlarining axboroti eshitildi.

Yoshlarni kasbga o‘qitish ko‘lamini oshirish, ishsiz yoshlarni kasb-hunarlarga o‘qitish va bu jarayonda nodavlat ta’lim muassasalarining ishtirokini kengaytirish maqsadida kasb o‘rganish istagidagi bitiruvchilarni davlat tomonidan kamida bir kasbni egallashiga ko‘maklashuvchi tizimni joriy etish bo‘yicha komissiyaning takliflari mas’ul vazirlikka taqdim etildi.

Shu bilan birga, Komissiya tomonidan xalqaro parlamentarizm borasida tajriba almashish, xorijiy davlatlar parlamentlarining yoshlar tuzilmalari bilan o‘zaro manfaatli hamkorlik aloqalarini yanada mustahkamlash bo‘yicha ham muayyan ishlar amalga oshirildi.

Masalan, Komissiya a’zolari Rossiya Federatsiyasining Sankt-Peterburg shahrida o‘tkazilgan “Yosh parlamentariylar – Hamdo‘stlik kelajagiga nazar” mavzusidagi xalqaro forumda, Qozog‘iston Respublikasida bo‘lib o‘tgan Turkiy tilli davlatlar Parlament assambleyasining Yosh parlamentariylar guruhining “Texnologiyalar asrida bolalar va yoshlar” mavzusida konferensiyada faol ishtirok etdi.

Umuman olganda, Komissiya 2022 yilda o‘z oldiga qo‘ygan maqsadlarga to‘liq erisha oldi. 2023 yilda ham oldimizga katta vazifalar turibdi. Bu borada o‘sib kelayotgan yosh avlod vakillariga har tomonlama e’tibor va g‘amxo‘rlik ko‘rsatish, ularning intilishlarini qo‘llab-quvvatlash, yigit-qizlar bandligini ta’minlash, ularning orzu-istaklarini ro‘yobga chiqarishga bor imkoniyatlarimizni safarbar etamiz.

Muhammad VALIYEV,

Oliy Majlis Qonunchilik palatasining

Yoshlar masalalari bo‘yicha komissiya raisi