Oliy Majlis palatalari va Siyosiy Partiyalarning roli yana-da oshiriladi

Rejalashtirishning puxtaligi va vazifalarning aniqligi samaradorlik va maqsadga to‘laqonli erishishning garovidir. Shu boisdan davlatimiz rahbarining farmoni bilan tasdiqlangan “O‘zbekiston – 2030» strategiyasi mamlakatimizning kelgusi yetti yilligida qudratli Yangi O‘zbekistonni barpo etish, xalqimizning erkin va farovon hayoti yo‘lida har bir fuqaroga o‘z salohiyatini rivojlantirish uchun barcha imkoniyatlarni yaratish, sog‘lom, bilimli va maʼnaviy barkamol avlodni tarbiyalash, global ishlab chiqarishning muhim bo‘g‘iniga aylangan kuchli iqtisodiyotni shakllantirish, jamiyatimizda adolat, qonun ustuvorligi, xavfsizlik va barqarorlikni kafolatli taʼminlashda muhim dasturilamal bo‘lib xizmat qiladi.

Aytish joizki, joriy yilning 30 aprelida o‘tkazilgan Umumxalq referendumida xalqimiz tomonidan yakdillik bilan qabul qilingan yangi tahrirdagi Konstitutsiya va mazkur xalq Konstitutsiyasi asosida o‘tkazilgan ilk Prezidentlik saylovi, shuningdek, so‘nggi yillarda Yangi O‘zbekistonni barpo etish yo‘lida amalga oshirilgan keng ko‘lamli islohotlarimiz jarayonida orttirilgan boy tajriba, qolaversa, fuqarolarimizning xohish-istaklari, takliflari asosida ishlab chiqilgan ushbu dasturiy hujjat 5 ta yo‘nalish bo‘yicha 100 ta muhim maqsadni qamrab olganligi bilan ham mamlakatimizning kelgusi rivojiga katta hissa qo‘shadi. Bu yo‘nalishlar “Adolat” sotsial-demokratik partiyasi das­turiy maqsad va vazifalari bilan hamohang. 

“Adolat” SDP uchun oliy qadriyat, bu – inson, uning huquq va erkinliklaridir. Strategiyada aholining o‘rtacha umr davomiyligini 78 yoshga yetkazish, 2026 yilga qadar kambag‘allikni 2022 yilga nisbatan 2 barobarga kamaytirish, tibbiy yordamga muhtoj aholining 70 foiz murojaatlarini birlamchi bo‘g‘inning o‘zida hal etishga erishish kabi maqsadlarning alohida belgilanishi inson qadri uchun tamoyilini amalga oshirishda muhim o‘rin tutadi. 

Shu bilan birga partiyamiz ilm-fan, innovatsiyalar va taʼlim sohasining barqaror rivoji – taraqqiyotimiz kafolati, deb hisoblaydi. Sifatli taʼlim, shubhasiz, baxtli va farovon kelajak kafolatidir. Hozirgi kunda rivojlangan davlat maqomiga yetishish uchun aholining bilim saviyasini oshirish va dunyoqarashini talab darajasida shakllantirish muhim ahamiyat kasb etadi.

Strategiyada bolalarni maktabgacha taʼlim va tayyorlov guruhlari bilan to‘liq qamrab olish, “Top-500”ga kiradigan xorijiy universitetlar bilan hamkorlikda kamida 50 ta qo‘shma taʼlim dasturi asosida “ikki dip­lomli tizim”ni joriy etish kabi maqsadlarning belgilanishi ham ushbu hujjat qamrovi naqadar kengligini ko‘rsatib turibdi.

Maʼlumki, “Adolat” sotsial demokratik partiyasi doimiy ravishda korrupsiyadan xoli jamiyat qurish yo‘lida xalqimiz bilan birgalikda xarakat qilib kelmoqda. Strategiyadagi bu maqsadlar aholi, xususan, yoshlar o‘rtasida korrupsiyaga qarshi murosasiz munosabatda bo‘lish muhiti va madaniyatini shakllantirish, davlat organlari va mansabdor shaxslar faoliyatiga “Toza qo‘llar” siyosatini singdirish, qonun ustuvorligini taʼminlash maqsadlari ham mamlakat taraqqiyotida ustuvor ahamiyatga ega.  

“Adolat” sotsial-demokratik partiyasi barcha sohalarda ijtimoiy adolatni qaror toptirish tarafdoridir. Biz anʼanaviy sotsial-demokratiyaning ijtimoiy adolat tamoyili va keng ko‘lamli dasturlarning amalga oshirilishini taʼminlaydigan kuchli ijtimoiy davlat siyosatini qo‘llab-quvvatlaymiz. Fuqarolarni ijtimoiy himoya qilish va bu yo‘nalishda tadbirkorlik subyektlarini qo‘llab-quvvatlash bo‘yicha “Ijtimoiy davlat – 2030” dasturini ishlab chiqish taklifimiz inobatga olingani va qabul qilingan “O‘zbekiston — 2030” strategiyasidek muhim hujjatdan o‘rin olgani partiyadosh­larimizni quvontirdi.  

Jumladan, strategiyada barqaror iqtisodiy o‘sishni taʼminlash orqali mamlakatimizning daromadi o‘rtachadan yuqori bo‘lgan davlatlar qatoridan o‘rin olishiga erishish, aholi talablariga va xalqaro standartlarga to‘liq javob beradigan taʼlim, tibbiyot va ijtimoiy himoya tizimini tashkil qilish, fuqarolarimiz uchun qulay ekologik turmush sharoitlarini yaratish, xalq xizmatidagi adolatli va zamonaviy davlatni barpo etish, mamlakatimizning suvereniteti va xavfsizligini kafolatli taʼminlash kabi ezgu maqsadlar asosiy g‘oyalar sifatida belgilandi.

Ahamiyatlisi, Yangi O‘zbekistonni barpo etishda Oliy Majlis palatalari va siyosiy partiyalar rolini yana-da oshirishga alohida eʼtibor qaratilayotganligi kelgusida ham milliy davlatchiligimizni mustahkamlash, jamiyatni demokratlashtirish va erkinlashtirish, fuqarolarning ijtimoiy-siyosiy va sotsial-iqtisodiy faolligini oshirish va shu orqali inson huquq va manfaatlarini to‘laqonli taʼminlashga xizmat qiladi.

Ushbu dasturiy hujjatda parlament va uning organlari ish jarayonlarini raqamli transformatsiya qilish, shu jumladan, ular tomonidan qarorlar qabul qilish va eʼlon qilish jarayonlarini 100 foiz raqamlashtirish, saylovchilar bilan elektron muloqot qilish, deputat so‘rovini elektron tarzda yuborish va nazorat qilish imkoniyatini taʼminlash, qonunchilikka oid takliflarni kiritish va ko‘rib chiqish tartibini joriy qilish, qolaversa, demokratik islohotlarni chuqurlashtirish va mamlakatni modernizatsiya qilishda siyosiy partiyalarning rolini yana-da kuchaytirish maqsadida vakillik organlariga saylovning aralash (majoritar-proporsional) tizimini joriy qilishga qaratilgan aniq maqsad va vazifalarning belgilanganligi har jihatdan ahamiyatli bo‘ldi.

Shu o‘rinda taʼkidlab o‘tish kerakki, “Adolat” SDP ham bir necha yillardan buyon o‘z dasturiy-maqsadlarida parlamentarizmni rivojlantirish, parlament demokratiya­sining zamonaviy institutlarini qo‘llab-quvvatlash, davlat hokimiyati va boshqaruvi tizimida vakillik organlarining rolini kuchaytirish, deputatlarning saylovchilar va partiya oldida masʼuliyatini hamda hisobdorligini oshirish, deputatlar faoliyatini xalq bilan uzviy bog‘lash maqsadida “Elektron parlament” va “Elektron hukumat” dasturlarini izchil amalga oshirish, fuqarolar va barcha darajadagi vakillik organlari o‘rtasida doimiy muloqot va aloqalarni kengaytirish g‘oya­larini ilgari surib kelmoqda. O‘z o‘rnida mazkur g‘oyalar mamlakatimizda fuqarolik jamiyatini yana-da jadal shakl­lantirish va rivojlantirish bilan birgalikda, ushbu yo‘nalishdagi zamonaviy xalqaro tendensiyalariga to‘la javob beradi.

Bugungi kunda saylovning aralash (majoritar-proporsional) tizimi jahonning Germaniya, Bolgariya, Gruziya, Litva, Italiya kabi mamlakatlarida samarali qo‘llanilib kelinmoqda. Qolaversa, parlament va uning organlari ish jarayonlarini raqamli transformatsiyalash, ushbu sohaga zamonaviy, raqamli texnologiyalarni keng joriy etish, qonun ijodkorligi va qarorlar qabul qilish jarayonlarining shaffofligini taʼminlash bilan bir qatorda, saylovchilar bilan faol muloqot olib borish, deputatlar ish faoliyatini samarali tashkil etish va nazorat qilish imkonini yaratadi.

Shuningdek, strategiyada aholimizning siyosiy-huquqiy madaniyatini oshirish, taʼlim, ilm-fanni yuksaltirish, jamiyatimizda sog‘lom turmush tarzini keng targ‘ib qilish, fuqarolarimizning sifatli, malakali tibbiy xizmatlardan to‘laqonli foydalanishini taʼminlash, tibbiyot va pedagog kadrlarning maqomini mustahkamlash kabi partiyamiz g‘oyalariga hamohang, davlatimiz va jamiyatimiz rivojiga daxldor masalalar o‘z ifodasini topgan.

Muxtasar aytganda, bugun fuqarolarimiz orzu-istak­laridan, zamon talabidan kelib chiqib, puxta o‘ylangan rejalar asosida aniq vazifalar belgilandi, endi ular qog‘ozda emas amaliyotda, xalqimiz hayotida bo‘y ko‘rsatmog‘i lozim. Buning uchun barchamizdan yuksak masʼuliyat va xalqimizning erkin va farovon hayoti uchun qud­ratli Yangi O‘zbekistonni barpo etish yo‘lida fidokorona mehnat qilishimiz talab etiladi.

Bahrom ABDUHALIMOV, 

O‘zbekiston “Adolat” SDP 

Siyosiy Kengashi raisi