OMQP deputati ishtirokidagi konstitutsiyaviy targʻibot tadbirlari qizgʻin pallaga kirdi

Avval xabar berganimizdek, Oliy Majlis Qonunchilik palatasi deputati M.Qurbonboyev xonqalik saylovchilari huzurida boʻlib, yangi tahrirdagi Konstitutsiyaning mazmun va mohiyatiga bagʻishlangan targʻibot tadbirlarini uyushqoqlik bilan amalga oshirmoqda.

Targʻibot tadbirlariga xonqalik saylovchilar bilan birgalikda tuman hokimi, tumanda faoliyat olib borayotgan mutasaddi tashkilot rahbarlari, tuman faollari hamda ommaviy axborot vositalari vakillari ishtirok etishmoqda.

Deputat ochiq muloqotlari davomida tuman boʻylab Konstitutsiyaga kiritilayotgan oʻzgarish va qoʻshimchalar toʻgʻrisida gapirib, unda inson erki, qadr-qimmati asos qilib olingani xususida hayotiy misollar bilan atroflicha maʼlumotlar berib bormoqda.

Xususan, Konstitutsiya xalq fikrini oʻrganish asosida mamlakat Konstitutsiyasini takomillashtirish, xalqimizning turmush farovonligini yanada oshirish, Konstitutsiyaga kiritilayotgan barcha yangi moddalar fuqarolarning oʻz hayotidan bekam-u koʻst rozi boʻlib yashashlariga xizmat qilishidagi oʻrni toʻgʻrisidagi moddama-modda berilayotgan tushunchalar saylovchilar diqqat markazidan joy olayotgani bilan hamda joriy yilning 30-aprelida boʻlib oʻtadigan referendumda faol ishtirok etishida muhim ahamiyatga ega boʻlmoqda.

Deputatning “Sarapoyon” madaniyat markazida Respublika “Markaziy” bank rahbari, iqtisodiyot soha xodimlari, “Istiqlol” madaniyat saroyida Respublika “Markaziy” bank monitoring departamenti boshligʻi hamda tumanda faoliyat olib borayotgan barcha bank yetakchilari, xodimlari ishtirokidagi, tuman Tibbiyot birlashmasi va 42 –son umum oʻrta taʼlim maktabida tashkil etilgan targʻibot tadbirlari ham konstitutsion islohotlarning inson hayotidagi ahamiyatiga qaratilgan suhbatlar asosida qizgʻin kechdi.

Tadbirlar davomida konstitutsiyaviy yangilanishlar toʻgʻrisidagi fikr va mulohazalar, eʼtiroflar har bir tinglovchi qalbida insonlari qadr topgan yurtda yashab, mehnat qilayotganidan faxrlanish tuygʻularini yanada mustahkamladi va 30-aprel kuni yangi tahrirdagi Konstitutsiyani qoʻllab-quvvatlab ovoz berishga chorladi.

Tumanda bu kabi targʻibot tadbirlari yuqori saviyada davom etmoqda.

Zamira ABDULLAYEVA,
“Adolat” SDP
Xorazm viloyat Kengashi matbuot kotibi