OMQP deputati M.Qurbonboyevning tuman boʻylab muloqotlari samarali davom etmoqda

Oliy Majlis Qonunchilik palatasi deputati M.Qurbonboyevning   Xonqa tuman   “Madaniyat” mahallasida   tuman hokimi M. Davlatov bilan hamkorlikdagi   sayyor qabuli fuqarolarning qonuniy talablari, soʻrov va takliflarini amalga oshirish bilan bir qatorda aholi bilan dildan muloqot qilish va turmush sharoitini tubdan oʻrganishga xizmat qilmoqda. Xususan, fuqarolar tomonidan turli masalalar yuzasida murojaatlar bildirildi. Jumladan,   “Madaniyat” mahalla aholisi tomonidan tomorqa yerlarni sugʻorish hamda ichki yoʻllarni asfalt qilib berish, “Istiqlol” mahallasida yashovchi N. Rahmonova   qaynonasi nomidagi uyni kadastrlashtirib turmush oʻrtogʻini nomiga rasmiylashtirib berishga,   “Porloq” mahallasida yashovchi A. Iskandarova farzandlariga bola puli tayinlashda, “Znaxos” mahallasida yashovchi X. Yaqubov tomorqa yerlarni sugʻorish va uyini kadastr qilib berishda amaliy yordam soʻrab qilgan murojaatlari deputat va tuman hokimi tomonidan eʼtiborga olindi va muammolarni bartaraf etish choralari boshlab yuborildi.

Tahlillarga koʻra, qabul davomida murojaatlarning aksariyati tuman aholisi dehqonchilik bilan shugʻullanishida oqar suv masalasidagi muammolardan iborat boʻldi.Qayd etilgan muammolar yuzasidan mutasaddilarga murojaat etildi va muammolarni yechimini topish choralariga qoʻl urildi. “Madaniyat” mahallasida yashovchi bir guruh fuqarolarning ichimlik suvi yuzasidan bildirgan murojaatlari ham joyga chiqib oʻrganildi.

Oʻtgan 2022-yilda ushbu mahalladagi qarovsiz holga kelib qolgan suv taqsimlash inshooti mukammal taʼmirlanib, hududdagi 16 kilometr uzunlikdagi ichimlik suvi tarmoqlari yangilanib va 230 ta xonadon tarmoqqa ulangan edi.   Mahalladagi qolgan ichimlik suv tarmoqlari eskiligi bois avariyalar yuzaga kelib, taʼminotda uzilishlar koʻp uchrayotgandi. Soha mutasaddilariga eski va yangi liniyalarni ajratuvchi qurilma oʻrnatish hamda bosimni muntazam nazorat qilish choralarini koʻrish boʻyicha koʻrsatmalar berildi.

Qabul davomida bayon etilgan muammolarning barchasi eʼtibordan chetda qolmadi. Muloqotlar davomida Referendum oldi targʻibot –tashviqot ishlari ham samarali amalga oshirildi.Bir soʻz bilan aytganda, deputat M.Qurbonboyevning tuman hokimi va mutasaddi tashkilot rahbarlari bilan hamrohlikdagi muloqotlarining tizimli yoʻlga qoʻyilgani, koʻplab muammolarni bartaraf etilishida va oldi olinishida ahamiyati katta boʻlmoqda.

Deputatning tuman boʻylab muloqotlari davom etmoqda.

Zamira Abdullayeva,

    “Adolat” SDP Xorazm viloyat Kengashi matbuot kotibi.