“Ona va bola sogʻligʻiga eʼtibor”

Inson uchun  dunyoda eng muhim boylik-bu, salomatlikdir. Shu boisdan ham bugungi kunda mamlakatimizda aholi salomatligini mustahkamlash, turli kasalliklarni oldini olishga alohida eʼtibor qaratilmoqda.  Aynan mana shunday ezgu maqsadlar yoʻlida “inson qadri uchun” degan ezgu tamoyilga asoslanib, “Adolat” SDP Romitan tuman Kengashi raisi R.Xayitov, mahalliy Kengash deputatlari O.Islamova, L.Avezova, ”Ayollar qanoti” Kengashi raisi L.Yodgorova, “Yosh adolatchilar”, partiya faollari va “Romitan” MFY aholisi ishtirokida “Ona va bola sogʻligʻiga eʼtibor” mavzusida davra suhbati tashkil qilindi.

-Davlatimiz rahbarining 2022 yil 24 — martdagi “Oʻzbekiston Respublikasi Prezidentining sogʻliqni saqlash sohasi vakillari bilan ochiq muloqotida belgilangan vazifalarni amalga oshirish chora-tadbirlari toʻgʻrisida”gi farmoyishi sohadagi koʻplab muammoli masalalar yechimiga qaratilgani bilan ahamiyatlidir. Prezidentimiz 18-mart kuni sogʻliqni saqlash sohasi vakillari bilan ochiq muloqot oʻtkazib, muammo va takliflarini eshitdi. Muloqotdan soʻng yuqoridagi farmoyish qabul qilindi.

Yettita yoʻnalishda vazifa va masʼullar belgilandi.

Birlamchi tibbiy xizmatlarni aholiga yaqinlashtirish, ularni tarmogʻini kengaytirish, tibbiy xizmatlarni sifatini oshirish, tibbiyot muassasalarini moddiy texnika bazasini yaxshilash, ularni tibbiy uskunalar va dori vositalari bilan taʼminlash shular jumlasidandir.

Joriy yilda 136 ta, 2023 yilda 140 ta yangi poliklinikalar faoliyati yoʻlga qoʻyiladi.

Olis va chekka mahallalarda maxsus konteynerlar oʻrnatilib, mahalla tibbiyot punktlarini tashkil etish rejalashtirilgan. Tibbiyot sohasini raqamlashtirish jadallashtiriladi, zamonaviy texnologiya va jihozlar bilan taʼminlanadi. Shifokorlar kasbini maqomi va nufuzi oshiriladi. Ularni huquqiy — ijtimoiy himoyasini kuchaytirish borasida ham aniq vazifalar belgilandi. Ularning oylik maoshlari ham malaka toifasiga qarab 15 foizgacha oshiriladi-deydi Romitan tuman Kengashi raisi R.Xayitov.

Shuningdek , Ona va bola sogʻligʻiga eʼtibor masalasida, aholining tibbiyot madaniyatini oshirish juda muhim oʻrinda boʻlib, fuqarolarimizga odamlarni sogʻlom turmush tarziga oʻrgatish.

Sogʻlom turmush tarzi yoʻlida doimo harakatda boʻlish, jismoniy mashqlar bilan shugʻullanish, toʻgʻri ovqatlanish barchamizning kundalik hayotimizdagi vazifamizga aylanmogʻi darkor.

— Maʼlumki, ming yillar davomida har qaysi jamiyatning madaniy darajasi va maʼnaviy barkamolligi ayollarga boʻlgan munosabat bilan belgilangan. Ayolni eʼzozlash, unga ehtirom koʻrsatish oʻzbek xalqiga xos xususiyatdir.

Hadisi sharifdagi “Jannat onalar oyogʻi ostidadir”, “Avval onangizga, yana onangizga, va yana onangizga, soʻngra otangizga yaxshilik qiling”, degan benazir soʻzlarda ham ana shu adoqsiz ehtirom namoyon boʻlib turibdi. Shu maʼnoda mustaqil Oʻzbekistonimizda xotin — qizlarning jamiyatdagi oʻrni va mavqeyini mustahkamlash borasida davlat ahamiyatiga molik salmoqli ishlar amalga oshirilmoqda.

Yurtimizda ayollarga, “Ona va bola”ga alohida berilayotgan eʼtiborni shunda koʻrish mumkinki, 1999 yil “Ayollar yili”, 2000 yil “Sogʻlom avlod” yili, 2001 yil “Onalar va bolalar” yili, 2005 yil “Sihat-salomatlik yili”, 2012 yil “Mustahkam oila yili”, 2013 yil “Obod turmush yili”, 2016 yil “Sogʻlom ona va bola yili” deb eʼlon qilinishida va shu munosabat bilan amalga oshirilayotgan ezgu ishlar, tadbirlar zamirida ham ayolga hurmat, ehtirom, jismoniy kamoloti xususida fikrlash, qaygʻurish hissi borligi yaqqol namoyon boʻladi.

Oila va uning taʼsirida shakllanuvchi insoniy fazilatlar, birinchi galda, onaning oq sutidan, uning chaqaloqqa boʻlgan mehr – muhabbatidan, beshik tebratib oʻtkazgan bedor tunlaridan, ehtirosga va zavq – shavqqa toʻla havasmand onlaridan boshlanadi.

Ayol allasi oʻziga xos millat madhiyasidir. Chunki bunda Vatanni oʻziga jam qilgan onaning orzusi, uning javobgarligi, uning mehri joʻsh urib turadi.

Mamlakatimizning siyosiy hayotida, davlat va jamiyat boshqaruvida, iqtisodiyotimizning barcha tarmoqlarida, madaniyat, ilm-u fan, xalq taʼlimi, sogʻliqni saqlash, sport kabi ijtimoiy sohalarda ayollarimizning oʻrni va roli ortib borayotganligi ayniqsa eʼtiborlidir.

Bugun Oʻzbekistonda demokratik davlat, fuqarolik jamiyati barpo etilmoqda. Fuqarolik jamiyati ayollardan ham oʻz haq – huquqlarini, manfaatlarini himoya qilishni va ulardan oʻz muammolarini yechishga boʻlgan tabiiy intilishni talab qiladi. Xotin qizlarning bunga tayyor boʻlishi muhim ijtimoiy ahamiyatga ega.

Shuni alohida taʼkidlash lozimki, fermerlik, kichik va oʻrta biznes, xususiy tadbirkorlik faoliyati kabi hozirgi zamon va bozor munosabatlari talab qilayotgan sohalarda ham xotin–qizlarning faol ishtiroki va nufuzi tobora kuchayib borayotganiga guvoh boʻlib turibmiz.

Qizlarimiz, ayollarimizning jismonan baquvvat boʻlishi bizning bundan keyingi taraqqiyotimizning muhim zaminlaridan hisoblanadi. Bugungi kunda koʻplab yosh qizlar, ayollarimizning asosiy maqsadi ijtimoiy – iqtisodiy islohotlar jarayonida faollikni oshirish, yuksak maʼnaviy fazilatlarni mujassamlashtirish, milliy tafakkurni shakllantirishdan iborat.

Yoshlarni madaniy, tarixiy anʼanalarimizga hurmat, Vatanga muhabbat, istiqlol gʻoyalariga sadoqat ruhida tarbiyalash, qizlarni oilaviy turmushga tayyorlash, tadbirkorlik va kasb – hunarga oʻrgatish bugungi kunning dolzarb masalalariga aylandi. Yosh ayollar, qizlarni ish bilan band etish, tadbirkorlik tashabbuslarini amalga oshirishda, kichik va oʻrta biznesda, ayniqsa qishloq joylarida xotin – qizlar tashabbuslarini qoʻllab quvvatlash, ularga huquqiy va ijtimoiy shart – sharoitlarni kengaytirish muhim ahamiyatga ega.

Xulosa qilib aytganda, ayol – ijodkor, ayol – har ishda madadkor. Hayotni hayotga, avlodni avlodga ulovchi ayol. Ayol – oilaning, jamiyatning ishonchi, tayanchidir.

Tadbir soʻngida ishtirokchilar oʻzlarini qiziqtirgan savollar bilan murojaat qilib, barcha qiziqtirgan savollariga toʻliq va batafsil javob olishdi.

Mohigul Rahimqulova,

“Adolat” SDP Buxoro viloyat Kengashi matbuot kotibi.