Onkologiya sohasidagi islohotlar inson qadrini ulugʻlashga xizmat qilmoqda

Soʻngi besh yil ichida mamlakatimizda onkologiya sohasini rivojlantirish eng ustuvor va muhim vazifalardan biri hisoblanmoqda. Onkologiya sohasiga ajratilayotgan mablagʻlar yil sayin ortib borayotgani, dori vositalari bilan taʼminlanish darajasi 10-15 foizdan 90-95 foizgacha keskin yaxshilangani, diagnostika va davolashning yangi yuqori texnologiyali usullari barcha hududiy onkologiya filiallarida joriy etilayotgani aholi salomatligi uchun eng muhim oʻrin egallaydi.

Davlatimiz rahbarining taʼbiri bilan aytganda, “Bizning oldimizga qoʻygan eng ustuvor yoʻnalish — bu odamlarni fikrlashini, ongini oʻzgartirishdir”. Shu oʻrinda taʼkidlash joizki, dunyoqarashning oʻzgarishi uchun asosiy yoʻnalish bu xorijiy mutaxassislar bilan oʻzaro hamkorlikni rivojlantirishdir.

2023-yil 2-oktyabrdan 11-oktyabrgacha Oʻzbekistonda Geydar Aliyevning 100-yilligiga bagʻishlangan salomatlik haftaligi oʻtkazildi. Ushbu haftalik doirasida onkologiya sohasida ishlovchi Ozarbayjonlik ikkita yetakchi olim-shifokorlar Oʻzbekistonga amaliy tashrif buyurdilar.

Mutaxassislar haftalikning birinchi kuni, 2-oktyabr 2023yili Respublika ixtisoslashtirilgan onkologiya va radiologiya ilmiy amaliy tibbiyot markaziga tashrif buyurdilar va mutaxassislar bilan davra suhbati oʻtkazdilar.

Abdominal onkologiya boʻyicha mutaxassis Ozarbayjon onkologiya milliy markazi abdominal boʻlimi rahbari Niyazi Askerov 3-oktyabrdan 10-oktyabrgacha Xorazm viloyatida onkologiya hastaligiga chalingan 11 ta bemorda yuqori texnologik jarrohlik amaliyoti –laparaskopik oshqozon rezeksiyasi, qorin boʻshligʻi organlari rekonstruksiyasi bilan oshqozon osti bezi rezeksiyasi amaliyotlari oʻtkazildi va Ozarbayjon onkologiya milliy markazi bilan filialimiz oʻrtasida memarondum tuzildi. Mutaxassislar tomonidan tashxis va davolash boʻyicha oʻz tavsiyalarini berdilar.

Sohaga qaratilayotgan eʼtiborni Xorazm viloyati aholisiga ixtisoslashtirilgan onkologiya xizmati boʻyicha koʻradigan boʻlsak, Respublika ixtisoslashtirilgan onkologiya va radiologiya ilmiy — amaliy tibbiyot markazining Xorazm filiali 125 oʻringa moʻljallangan boʻlib, uning qoshida tashkil qilingan kuniga 150 nafar bemorni qabul qilishga   moʻljallangan poliklinika tomonidan va viloyatning shaharlari va tumanlarida 13 ta onkokabinetlar orqali xalqimizga tibbiy xizmat koʻrsatish amalga oshirilmoqda.

Har yili oʻrtacha 1300-1400 nafar onkologik kasalliklar birlamchi aniqlanadi. Viloyat boʻyicha dispanser hisobida 7626 nafar bemor onkologik kasalliklar bilan hisobda turadi.

2023-yil 6 oyida viloyat boʻyicha xavfli oʻsmalar bilan birlamchi 748 nafar bemor hisobga olingan boʻlib, kasallanish koʻrsatkichi 100 ming aholiga nisbatan 38,2 ga teng boʻldi (2022-yil 6 oyida 34,8 ga teng boʻlgan).

Shuningdek, joriy yilning 6 oyi davomida birinchi bosqichda — 95 nafar, ikkinchi bosqichda 288nafar, uchinchi bosqichda – 277 nafar va toʻrtinchi bosqichda 48 nafar bemor birlamchi aniqlandi, 517 ta umumiy operatsiyalar amalga oshirilib, 2500 nafar kimyoterapiya hamda 261 nafar bemorda nur terapiyasi oʻtkazilgan.

Onkologik kasalliklarni profilaktikasi, erta diagnostikasi va davolash bilan birga, hududiy onkologiya muassasalarini moddiy texnik bazasini tubdan yaxshilash, kadrlarni malakasini oshirish, chet el klinikalari bilan hamkorliklarni yoʻlga qoʻyish borasida bir qator amaliy ishlar bajarilmoqda. Natijada, 2018 — 2019-yillarda viloyatdan Toshkent shahriga 3000 nafardan ortiq bemor (shundan 1700 nafarga yaqini order va 1500 nafarga yaqin bemorlar oʻz xohishlari bilan) borib davolanishga majbur boʻlgan boʻlishsa, 2023-yilning oʻtgan 6 oyida ushbu koʻrsatkich 96 nafarni tashkil etyapti. Bu koʻrsatkichlar oʻz navbatida sohaga qaratilayotgan eʼtibor va yaratilayotgan imkoniyatlar mahsulidir.                                                                     

                                                                            Toxir Palvanov,

                                                  RIO va RIATM Xorazm filiali direktori,

                                “Adolat” SDP Xorazm viloyat Kengashi raisi, deputat.