Ortiqcha sarsongarchiliklarning oldi olinadi

Ta’kidlanganidek, mamlakatimizda qonun ustuvorligini ta’minlash, fuqarolarning konstitutsiyaviy huquqlarini ro‘yobga chiqarish va jamiyatda adolatni qaror toptirishda odil sudlov alohida o‘rin tutgani bois, so‘nggi yillarda sud-huquq sohasini tubdan isloh etishga qaratilgan keng qamrovli ishlar amalga oshirildi.

Bu sa’y-harakatlar sud hokimiyati mustaqilligini hamda sudlar faoliyatida ochiqlik va shaffoflikni ta’minlash bilan birga fuqaro va tadbirkorlarning huquq hamda qonuniy manfaatlarini himoya qilish kafolatlarini kuchaytirish imkonini berdi.

Taklif etilayotgan qonun loyihasi yagona sud amaliyotini ta’minlash, huquqni qo‘llash amaliyotida vujudga kelayotgan ayrim muammo va qonunchilikdagi bo‘shliqlarni bartaraf etish maqsadida ishlab chiqilgan bo‘lib, unda bir qator yangiliklar o‘z aksini topmoqda.

Ushbu qonun loyihasining qabul qilinishi sudyalarning mas’uliyatini oshirishga, ishlarning sifatli va o‘z vaqtida ko‘rilishiga, sud qarorlarini qayta ko‘rishda viloyat sudlarining hamda ularga tenglashtirilgan sudlarning imkoniyatlaridan samarali foydalanishga, ortiqcha sarsongarchiliklarga yo‘l qo‘ymaslikka xizmat qiladi.

Deputatlarning fikricha, adolatning qaror topishida sud hokimiyatining o‘rni katta. “Adolat” SDP ham sud hokimiyati mustaqil, sudlar esa adolat qo‘rg‘onlari bo‘lishi tarafdori. Shu bois, fraksiya a’zolari partiya maqsad va vazifalaridan kelib chiqqan holda, qonun loyihasi yuzasidan o‘z fikr-mulohazalarini bildirdi. Qizg‘in muhokamalardan so‘ng, qonun loyihasi qo‘llab-quvvatlandi.

Yig‘ilishda shuningdek, O‘zbekiston Respublikasi Hisob palatasining 2022 yilgi faoliyati to‘g‘risidagi hisoboti ham ko‘rib chiqildi va deputatlar tomonidan ma’qullandi.