Oʻzbekiston Respublikasi Prezidentligiga nomzod Robaxon Maxmudova Sirdaryo viloyati saylovchilari bilan uchrashdi

Yurtimizda muhim siyosiy tadbir – Prezident sayloviga qizgʻin tayyorgarlik koʻrilmoqda. Ayni paytda saylov kompaniyasining muhim bosqichi — joylarda siyosiy partiyalardan Oʻzbekiston Respublikasi Prezidentligiga nomzodlarning saylovchilar bilan uchrashuvlari boʻlib oʻtmoqda.

Bugun “Adolat” sotsial-demokratik partiyasidan Oʻzbekiston Respublikasi Prezidentligiga koʻrsatilgan nomzod Robaxon Mahmudovaning saylovchilar bilan navbatdagi uchrashuvi Sirdaryo viloyati Guliston shahridagi Yoshlar markazida boʻlib oʻtdi.

Tadbirda partiya faollari, deputatlar, mehnat faxriylari, faol xotin-qizlar va yoshlar hamda ommaviy axborot vositalari vakillari ishtirok etishdi.

Muloqotni Oʻzbekiston “Adolat” sotsial-demokratik partiyasi Sirdaryo viloyat kengashi raisi Jamol Komilov kirish soʻzi bilan ochib berdi.

2023-yil 9-iyul sanasida boʻlib oʻtadigan Prezidentlik saylovi Oʻzbekistonning kelgusidagi barqaror taraqqiyoti va rivojlanishi uchun muhimligi taʼkidlandi.

Soʻng Prezidentlikka nomzod Robaxon Maxmudovaning bosh ishonchli vakili Inomjon Qudratov tomonidan yigʻilganlarga nomzod haqida batafsil maʼlumot berildi.

Tadbir davomida “Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Maxmudova saylovchilarni oʻz Saylovoldi dasturining ustuvor yoʻnalishlari bilan yaqindan tanishtirdi.

Aytib oʻtilganidek, nomzod dasturida tadbirkorlik subyektlariga qoʻshimcha xarajatlar yuklaydigan barcha qoidalarni faqat qonunlar orqali qabul qilinishiga erishish, shuningdek, qonunlarni toʻgʻridan-toʻgʻri ishlaydigan mexanizmlar bilan qabul qilish, bu borada parlament qoʻmitalari ishini kuchaytirish, parlament faoliyatida tadbirkorlik subyektlari ishiga aralashmaslik, ularga oid masalalarni ijro organlaridan talab qilish, deputatlarning ish vaqtining yarmini oʻz saylovchilari yonida oʻtkazishini belgilovchi tartibni joriy etishni nazarda tutuvchi gʻoya va maqsadlar ilgari surilmoqda.

Qolaversa, uy-joy kommunal xizmat koʻrsatish sohasidagi boshqaruv kompaniyalari faoliyatini takomillashtirish, hududlar oʻrtasidagi iqtisodiy bir xil oʻsishni taʼminlab, barcha tuman va shaharlarni bir maromda rivojlantirish, subsidiyalar berish tizimini takomillashtirish va maqsadli ishlatilishi ustidan jamoatchilik nazoratini kuchaytirish, jarimalarni huquqbuzarlikning ijtimoiy xavfliligiga qarab belgilashga doir masalalarga ham nomzod dasturida alohida eʼtibor qaratilgan.

Shuningdek, bogʻchalarda jamoatchilik nazorati kuchaytirilib, bogʻcha va maktablarga ochiq, shaffof tanlov asosida ishga olish tizimini yaratish, davlat hisobidan koʻrsatiladigan tibbiy xizmatlar va dori vositalari roʻyxati takomillashtirilib, ijtimoiy dorixonalar rivojlantirilishi, ogʻir kasalliklarni davlat tomonidan davolashni kengaytirish, aholi bandligini taʼminlash, yangi ish oʻrinlarini yaratish, aholining real daromadlarini oshirish borasidagi takliflar tadbir ishtirokchilarining eʼtibor markazida boʻldi.

Uchrashuv davomida Oliy Majlis Qonunchilik palatasi deputati Nodira Djanibekova, Xalq deputatlari Sirdaryo viloyat Kengashi deputati Saloxiddin Elmurodov va Dilfuza Umerova, Xalq deputatlari Mirzaobod tuman Kengashi deputati Xaliqova Dildoralar soʻz olib, Prezidentlikka nomzod Robaxon Maxmudovaning Saylovoldi dasturida 9 yoʻnalishda mamlakatimiz ravnaqi, fuqarolarimiz farovonligiga daxldor gʻoya va maqsadlar taklif etilayotganligini taʼkidlash barobarida, yigʻilganlarni kutilayotgan muhim siyosiy, tarixiy tadbirda Robaxon Maxmudovaga ovoz berishga chaqirishdi.

Tadbir yakunida Prezidentlikka nomzod tomonidan Saylovchilarning savollariga batafsil javob berildi

Oʻzbekiston Respublikasi Prezidentligiga nomzod Robaxon Maxmudovaning saylovchilar bilan uchrashuvlari davom etadi.

Oʻzbekiston “Adolat” SDP
Sirdaryo viloyat Kengashi Matbuot xizmati.