Parkentda “Deputat va yoshlar” uchrashuvi boʻlib oʻtdi

Mamlakatimizda yoshlarning huquqiy savodxonligini oshirishga qaratilgan qator islohotlar izchillik bilan amalga oshirilmoqda. Bu kabi keng koʻlamli islohotlar zamirida avvalambor, yosh avlodni jamiyat hayotida siyosiy jihatdan faol, oʻz fikrini erkin ifoda eta oladigan, huquqiy madaniyati yuksak fuqaro sifatida tarbiyalash va shu orqali Fuqarolik jamiyatini yanada shakllantirish va yuksaltirishdan iboratdir. Mazkur vazifalarni tashkil etish va amalga oshirishda nafaqat tuman markazidagi yoshlar, balki chekka hududlarda istiqomat qilayotgan yoshlar oʻrtasida ham tashkil etish maqsadga muvofiq. Ushbu amaliy ishlarning davomi sifatida Parkent tumanida ham yoshlarning ijtimoiy-siyosiy bilimlarini yanada oshirish va huquqiy madaniyatini yuksaltirish maqsadida “Deputat va yoshlar” uchrashuvi oʻtkazildi.

Uchrashuv tumanning “Olmazor” mahallasi “Changi” qishlogʻida istiqomat qiluvchi yoshlar ishtirokida oʻtkazildi.

“Deputat va yoshlar” uchrashuvi doirasida oʻquvchi va yoshlar Xalq deputatlari Parkent tuman Kengashi deputati Mavluda Berdiqulova bilan uchrashdi. Uchrashuvda deputat mamlakatimizda yoshlarga boʻlgan eʼtibor, oʻsib kelayotgan barkamol avlodga boʻlgan gʻamxoʻrlik davlat siyosati darajasiga koʻtarilgani bilan ahamiyatli ekanligi, yoshlar uchun qaratilgan eʼtibor, ularni qoʻllab-quvvatlash darajasi kun sayin ortib borayotgani, oʻgʻil-qizlar uchun koʻplab imkoniyatlar eshiklari ochib berilayotganligini alohida eʼtirof etdi. Tadbir davomida yoshlar deputat bilan yuzma-yuz muloqotda boʻlib, oʻzlarini qiziqtirgan savollarini berdilar.

Misol uchun: “Deputatlik faoliyatini amalga oshirishdagi asosiy tamoyillar nimalardan iborat. Deputatlik soʻrovlarining ijrolari har doim ham ijobiy hal etilmoqdami?” degan savollariga deputat tomonidan toʻlaqonli javob berildi.

Tadbirda Xalq deputatlari Parkent tuman Kengashi deputati bilan yoshlarning jonli muloqoti davomida nafaqat savollarga javoblar olindi, balki takliflar va tashabbuslar ham olgʻa surildi. Bu holat shuni koʻrsatib turibdiki, olib borilayotgan islohotlar oʻz isbotini topayotganini koʻrsatmoqda. Yoshlarning huquqiy ongi oshmoqda, ularning siyosiy tarbiyasi ham oʻqituvchilari va ustozlari tomonidan shakllantirilmoqda.

“Adolat” SDP Toshkent viloyati Kengashi Matbuot xizmati.