“Parlament sport oʻyinlari” ning Buxoro viloyat bosqichi boʻlib oʻtdi

Oliy Majlis Senati Kengashining “Parlament oʻyinlari” sport oʻyinlari musobaqalarini tashkil qilish va oʻtkazish toʻgʻrisidagi qaroriga asosan, jumladan Xalq deputatlari mahalliy Kengashi deputatlari oʻrtasida futbol, voleybol, badminton, stol tennisi boʻyicha mana bir necha yildirki, Senat raisi kubogi uchun oʻziga xos bellashuvlar oʻtkazib kelinmoqda. Buxoro shahrida sport bilan shugʻullanish jumladan, sogʻlom turmush tarzini boʻyicha hayotiy koʻnikmalarni shakllantirish maqsadida, mamlakatimizda oʻtkazilib kelinayotgan “Parlament sport oʻyinlari” sport musobaqalarining viloyat bosqichi boʻlib oʻtdi.

Xalq deputatlari tuman va shahar Kengashlari deputatlaridan iborat terma jamoalar Buxoro Davlat universitetining sport maydonchasida dastlab, mini futbol boʻyicha oʻz mahoratlarini sinab koʻrdilar. Murosasiz kechgan bellashuvlar yakunida futbol bahslari vobkentlik mahalliy Kengash deputatlari foydasiga tugagani eʼlon qilindi. Peshku tumani vakillari bilan maydonga tushgan vobkentliklar oʻz raqiblarini 2:1 hisobida yengib mini futbol musobaqalarining mutlaq gʻolibiga aylandilar. Ikkinchi va uchinchi oʻrinlarda esa Peshku va Qorakoʻl tuman terma jamoalari joy olishdi.

Universitet sport zalida ham shu kuni muxlislar bilan gavjum boʻldi. Ular mahalliy Kengash deputatlardan iborat voleybol jamoalari oʻyinlarini katta qiziqish bilan kuzatib bordilar. Bu yerda ham belgilangan muddatlarda ham gʻoliblikka erishgan jamoa aniqlandi.
Shu tariq musobaqalarga puxta tayyorgarlik bilan kelgan Kogon tumani voleybol jamoasi faxrli 1-oʻrinni egallashga muvaffaq boʻldi. To'plangan ballarga qarab, ikkinchi oʻrin Buxoro tuman vakillariga uchinchi oʻrin esa Kogon shahri voleybolchi vakillariga nasib etdi.

Keyingi kuni oʻtkazilgan stol tennisi yakka bahslarida esa Xalq deputatlari Kogon shahri Kengashi deputati Rustam Muxtumov hamda Qorakoʻl tuman Kengashi deputati Raʼno Shukrullayevalar ustunlikka erishib ular ham barcha gʻoliblar qatori “Parlament sport oʻyinlari” sport musobaqalarining mintaqaviy bosqichida ishtirok etish huquqini qoʻlga kiritdilar.

Mohigul Rahimqulova,
“Adolat” SDP Buxoro viloyat Kengashi matbuot kotibi.