Partiya faoliyatida tashabbuskorlik zarur

Mamlakatimiz oʻz taraqqiyotining yangi bosqichiga qadam qoʻygan hozirgi vaqtda barcha sohalarda chuqur demokratik oʻzgarishlar amalga oshirilmoqda. Jumladan, fuqarolarning siyosiy faolligini oshirish, fikrlar rang-barangligi va ochiqlik tamoyillarini kuchaytirishga alohida eʼtibor qaratilmoqda. “Adolat” SDP tomonidan bu yoʻlda oʻz saylovoldi dasturida belgilangan vazifalardan kelib chiqib sezilarli ishlar amalga oshirilmoqda.

Albatta partiya faoliyatini jonlantirishda tashabbus va tashkilotchilik katta ahamiyatga ega. “Adolat” SDP Andijon viloyat kengashida oʻtkazilgan “Tahliliy axborot tayyorlash va takliflar ishlab chiqish mexanizmi” mavzusidagi oʻquv-seminar ayni shu maqsadga qaratildi. Unda partiya yetakchilari va mahalliy kengash deputatlari ishtirok etdilar.

Madaminjon Madazimov, “Adolat” SDP Andijon viloyat kengashi raisi:

- Bugungi kun har birimizdan tezkorlikni talab qilmoqda. Partiya faoli uchun bu doimiy shart. Biz hamma vaqt bir qadam oldinda yurishimiz lozim. Buning uchun amalga oshirilayotgan islohotlarda ishtirok etish, tahlil qilib borish bilan birga jamiyatimizni yanada rivojlantirishga xizmat qiladigan takliflar bilan chiqishimiz zarur. Xoʻsh, joriy yilda oldimizda qanday vazifalar turibdi. Partiya faoliyatini rivojlantirish uchun qoʻshimcha qanday vazifalarni bajarish zarur. Bugun ayni shu masalalar yuzasidan fikr almashdik.

Yigitali Bekboyev, “Adolat” SDP Xoʻjaobod tuman kengashi raisi: — Prezidentimiz taʼkidlaganlaridek, “Qaysi partiyaga mansubligidan qatʼi nazar, barcha yurtdoshlarimizni birlashtiradigan yagona va mushtarak maqsad – bu jonajon Oʻzbekistonimiz, uning buyuk kelajagidir. Ayni shu maqsad hammamizni ona yurtimizga sadoqat bilan xizmat qilishga daʼvat etadi”. Yangi Oʻzbekistonni barpo etishda ham birgalikda harakat qilishimiz lozim.

Andijonlik “adolatchilar” yangi loyihalar va oldinda turgan vazifalar boʻyicha oʻz takliflarini bildirdilar. Yil davomida partiya faoliyatini rivojlantirishga qaratilgan chora-tadbirlar ishlab chiqildi.

“Adolat” SDP Andijon viloyat kengashi
Matbuot xizmati.