Partiya kuzatuvchilarining referendumga tayyorgarligi muhokama etildi

Mamlakatimizda 30-aprel kuni boʻlib oʻtadigan umumxalq referendumiga “Adolat” SDP Navoiy viloyat Kengashi tomonidan ham qizgʻin hozirlik koʻrilmoqda.

Joylarda referendumni yuqori saviyada oʻtkazish, koʻp jihatdan partiya tomonidan biriktirilgan kuzatuvchilarning qay darajada huquqiy bilim va koʻnikmalarga ega ekanligiga bogʻliq.

Shu boisdan kuzatuvchilar faoliyati samaradorligini yanada oshirish maqsadida viloyatning har bir tuman va shaharlarida maxsus oʻquv seminarlari tashkil etilmoqda.

Ana shunday tadbirlardan biri Navoiy shahridagi “Barkamol avlod” bolalar maktabida boʻlib oʻtdi. Unda partiyaning viloyat Kengashi raisi, xalq deputatlari viloyat Kengashi raisi Rustam Hayitov qatnashdi va kuzatuvchilarga oʻz tavsiyalarini bildirdi.

Tadbirda qayd etilganidek, viloyatdagi jami 137 ta, Navoiy shahrida esa 18 ta referendum oʻtkazuvchi uchastka saylov komissiyalarida partiya kuzatuvchilari biriktirilgan.

Kuzatuvchining maqsadi referendumga tayyorgarlik koʻrish va uni oʻtkazishga doir barcha tadbirlarda, shu jumladan referendum kuni ovoz berish va ovozlarni sanab chiqish jarayonlarida referendum toʻgʻrisidagi qonunchilik hujjatlariga rioya etilishi ustidan jamoatchilik nazoratini amalga oshirishdan iborat.

Seminarda kuzatuvchilarga ogʻzaki tavsiyalardan tashqari va nazariy yanada mustahkamlash maqsadida Oʻzbekiston Respublikasi Markaziy saylov komissiyasi tomonidan tayyorlangan mahalliy kuzatuvchilar uchun eslatma broshyuralari tarqatildi.

Oʻzbekiston “Adolat” SDP Navoiy
viloyat Kengashi matbuot xizmati