Partiya yetakchisi B.Abduhalimov ishtirokidagi tadbir xorazmlik yoshlarni konstitutsion faollikka chorladi

Toshkent Tibbiyot akademiyasi Urganch filialida Oʻzbekiston “Adolat” SDP Siyosiy Kengashi raisi Bahrom Abduhalimov, Oliy Majlis Qonunchilik Palatasi deputati Maqsud Qurbonboyevlar ishtirokida “Konstitutsion islohotlar-inson qadri uchun” mavzusida maʼnaviy-maʼrifiy tadbir tashkil etildi.Tadbirga partiya faollari, deputatlari, BPT, “Ayollar va yoshlar” qanoti raislari, yosh adolatchilar, mazkur oliygohda taʼlim olayotgan talabalar, professor oʻqituvchilar hamda ommaviy axborot vositalari vakillari ishtirok etishdi.

Tadbirni “Adolat” SDP Xorazm viloyat Kengashi raisi Toxir Palvanov kirish soʻzi bilan ochib berdi. Unda yangilanayotgan Konstitutsiya inson qadr-qimmati eng asosiy masala etib belgilangani toʻgʻrisida taʼkidlandi. Partiya Siyosiy Kengashi raisi Bahrom Abduhalimov soʻzida Bosh Qomusimizga kiritilayotgan oʻzgartishlarning mazmun — mohiyati, ilm –fan, taʼlim rivojiga oid muhim jihatlari, Bosh Qomusimizning huquqiy — demokratik jamiyatni barpo etishdagi muhim omillari, inson qadri tamoyilini yanada mustahkamlash, ayniqsa, yoshlar masalasiga doir kiritilayotgan moddalar har bir unib –oʻsib kelayotgan yoshning kelajagi mustahkamlanayotganidan dalolat ekani xususida asosli misollar bilan tushuntirdi va slaydlar orqali ishtirokchilar eʼtiboriga havola etildi.

OMQP deputat M.Qurbanboyev soʻzida Konstitutsiyaga oʻzgartish va qoʻshimchalar kiritilayotgani zamirida jamiyat hayotini yanada demokratlashtirish asosiy maqsad qilib olingani va har bir fuqaroning huquq va erkinliklarini toʻliq kafolatlaydigan Qomusimiz shakllanayotgani va konstitutsiyaga kiritilgan bir qator yangi moddalar toʻgʻrisida gapirdi. TTA Urganch filiali direktori Rashid Roʻziboyev, partiyaning saylovoldi dasturida ilgari surilgan asosiy masalalar va partiya tomonidan olib borilayotgan saʼy harakatlarga ijobiy munosabat bildirdi. Yangilanayotgan Konstitutsiyaning xalqchil va hayotiyligi bilan keng omma orasida qoʻllab-quvvatlanayotganida partiyaning oʻrni beqiyos ekanini bir qator misollar bilan taʼkidlab oʻtdi va Oliygoh jamoasi va talabalari bilan birgalikda referendumda faol ishtirok etishini bildirdi.

Partiya yetakchisining biz yoshlarga yangi tahrirdagi Konstitutsiyamiz toʻgʻrisida bergan tushinchalari konstitutsiyaviy bilimlarimizni yanada boyitishi bilan bir qatorda, yurtimiz kamoli uchun shijoat bilan mehnat qilishga undadi, — deydi “Yoshlar parlamenti” aʼzosi, Toʻxtajon Quryazova. Yangilanayotgan Konstitutsiyamizni mazmun va mohiyati bilan yaqindan tanishar ekanmiz, partiyamizning saylovoldi dasturida ilgari surilgan koʻplab gʻoyalar bilan hamohang ekanidan qalbimiz gʻururga toʻldi. Porloq kelajagimiz Bosh Qonunimiz bilan mustahkamlanadi, demak biz vatanimiz ravnaqi uchun yanada faol va tashabbuskor boʻlishimiz kerakligini anglab yetdik va oldimizga ulkan maqsad va vazifalarni belgilab oldik.

Boʻlib oʻtgan tadbir davomida yangilanayotgan Konstitutsiyamiz toʻgʻrisidagi eshitganlarimizdan soʻng, zimmamizga katta masʼuliyat yuklanganini his etdim,- deydi tadbir ishtirokchisi, boʻlajak shifokor Zaynab Rahimboyeva OAVlarga bergan intervyusida. Toʻgʻri, davlatimiz tomonidan yoshlarga qaratilgan eʼtibor eʼtirofga loyiq. Ammo, yangilanayotgan Konstitutsiyada bu imkoniyatlar yanada takomillashib, mustahkamlanayotganing oʻzi har bir oʻgʻil-qiz baxtli kelajak bilan taʼminlanishiga kafolat deganidir. Bunga javoban, biz yoshlar yuqori bilim va salohiyatga ega boʻlib shakllanishimiz uchun oʻz ustimizda yanada koʻproq ishlashimiz, mehnat qilishimiz, yangi Oʻzbekistonimizni barpo etishda bor isteʼdodimizni safarbar etishimish, referendumda biz yoshlarning faol ishtirokimiz juda muhimdir.

Bir soʻz bilan aytganda, partiyamiz yetakchilari va faollari tomonidan oʻtkazilayotgan bu kabi tadbirlar, hayotimizning asosiy Qomusiga aylanib borayotgani, yangilangan Konstitutsiyamizni qoʻllab-quvvatlab, joriy yilning 30-aprel kuni boʻlib oʻtadigan referendumda keng jamoatchilikni faol ishtirokini taʼminlashda ahamiyatlidir.

Zamira Abdullaeva,

“Adolat” SDP matbuot kotibi.