Partiya yetakchisi B.Abduhalimov xorazmlik olimlar bilan uchrashdi

Avval xabar berganimizdek, Oʻzbekiston Respublikasi Fanlar Akademiyasi vitse-prezidenti Bahrom Abduhalimov Xorazm vohasiga tashrif buyurib, bir qator joylarda boʻldi va partiya faollari, yoshlar, olimlar bilan yangilanayotgan Konstitutsiyaning mazmun va mohiyati toʻgʻrisida targʻibot tadbirlari, dildan suhbatlar tashkil etildi.Xususan, B. Abduhalimovning Xorazm Maʼmun akademiyasiga tashrifi ham shu maqsadlarni oʻzi ichiga oldi va yangi imkoniyatlarga eshik ochdi. B.Abduhalimov akademiyada olib borilgan qurilish va taʼmirlash ishlari bilan yaqindan tanishdi. Akademiya qoshida tashkil etilgan yangi va turli adabiyotlar bilan boyitilgan kutubxona, muzey- ekspozitsiyadagi oʻzgarishlar, barcha talablarga javob beradigan zamonaviy bino, laboratoriyalar faoliyati bilan tanishgandan soʻng, akademiya jamoasini dildan qutladi va kelgusi ishlarida muvаffaqiyatlar tiladi. Oʻrganish davomida akademiyaning moddiy — texnik bazasini yanada yaxshilash, olimlarga qulay shart- sharoitlar yaratish, kutubxona va muzeyni yangi kitoblar va eksponatlar bilan boyitish va boshqa masalalar yuzasidan kelishib olindi.

Shunday soʻng, akademiya olimlari bilan “Yangilanayotgan Konstitutsiya — taraqqiyot garovi” mavzusida asosiy mezonimizga kiritilayotgan oʻzgarishlar va zaruriyatlar haqida davra suhbati tashkil etildi. Tadbirni Maʼmun akademiyasi raisi, b.f.d. professor, Ikram Abdullayev kirish soʻzi bilan ochib berdi. Unda, B.Abduhalimovning akademiyaga tashrifining asosiy maqsadi toʻgʻrisida gapirdi. B.Abduhalimov soʻzida mamlakatimizda kechayotgan siyosiy, ijtimoiy jarayon, amalga oshirilayotgan islohotlar ilm-fanning rivoji yoʻlida muhim qadam ekani toʻgʻrisida bayon etib, olimlarga qaratilayotgan va berilayotgan imkoniyatlarni yanada mustahkamlash masalasida bir qator fikr va mulohazalarini bildirdi. Mamlakatimizning ijtimoiy- siyosiy hayotida olimlarning oʻrni beqiyosligi toʻgʻrisidagi eʼtiroflar va boshqa ustuvor gʻoyalar olimlar diqqat markazidan joy oldi. Olimlar qiziqqan savollariga atroflicha javoblar oldilar va jamoa nomidan B.Abduhalimovga tashrif va eʼtibor uchun akademiya nomidan minnatdorlik bildirildi.

Zamira Abdullayeva,

“Adolat”SDP Xorazm viloyat Kengashi matbuot kotibi,

Oʻzbekiston jurnalistlar ijodiy uyushmasi aʼzosi.