Partiya yetakchisi oʻzi oʻqigan maktab faoliyati bilan tanishdi

Maʼlumki, yangi Oʻzbekistonimizdagi yangicha hayot har bir faol zimmasiga yanada ulkan masʼuliyat yukladi. Qaysi soha vakili boʻlmasin, mamlakatimiz rivoji, yurtimiz taraqqiyoti, farovon hayotimiz uchun bor kuch-gʻayratini, imkoniyat va isteʼdodini kuchliroq safarbar etishga kirishdi.

Respublika ixtisoslashtirilgan onkologiya va radiologiya ilmiy-amaliy tibbiyot markazi Xorazm filiali direktori, “Adolat” SDP Xorazm viloyat Kengashi raisi, deputat, tajribali onkolog Tohir Palvanov oʻzi oʻqib, tahsil olgan Yangiariq tumanidagi 27-son umum oʻrta taʼlim maktabiga tashrif buyurdi.

U dastavval, maktab jamoasi bilan suhbatlashib, mamlakatimizda olib borilayotgan islohotlar, yangi Oʻzbekistonimiz kelajagi, unda amalga oshiriladigan ustuvor rejalarda burch va masʼuliyatning naqadar muhim ekanligi kabi bir qator asosiy masalalar toʻgʻrisida fikr almashdi. Shundan soʻng deputat, maktab faoliyati bilan tanishdi, ijobiy ishlar bilan bir qatorda yechimini kutayotgan muammolar bilan qiziqdi.

Oʻquvchilar xavfsizligini taʼminlash maqsadida maktabni tevarak-atrofini devor bilan oʻrab olish, faollar zali kerakligi toʻgʻrisidagi qayd etilgan masalalar deputatning diqqat markazida boʻldi.

Maktab oʻquvchilarining partiya yetakchisi bilan suhbati ham maroqli kechdi. Tohir Palvanov oʻquvchilarning orzu istaklari, oldiga qoʻygan maqsadlari bilan doʻstlardek oʻrtoqlashdi. Oʻquvchilik davri shu maskanda oʻtgani, jamiyatda oʻz oʻrnini topishda ustozlari va ushbu maktabning oʻrni beqiyos ekani toʻgʻrisidagi hayotiy va samimiy suhbati yoshlarni yangi marralar sari yetakladi. Ularga vatanni sevish, tinchligimizni koʻz qorachigʻiday asrash, yaratilayotgan imkoniyatlardan oqilona foydalanish kabi tavsiyalari yoshlarning eʼtiborini tortdi.

                                                                                              Zamira Abdullaeva,

                 “Adolat” SDP  Xorazm viloyat Kengashi matbuot kotibi.