Partiyamiz faxriysi “Moʻtabar ayol” koʻkrak nishoni bilan taqdirlandi

Har qanday davlat va jamiyat taraqqiyoti bir qator omillar asosida yuz beradi. Bu jarayonda ayollar, ularning ijtimoiy-siyosiy munosabatlardagi ishtiroki, huquq va erkinliklari amalda taʼminlanganligi masalasi – davlatlar rivojining hamda demokratiyaning muhim indeksi sanaladi. Zotan, ayol va uning jamiyat hayotidagi oʻrni hamisha muhim mezon boʻlib kelgan.

Ayollarni qoʻllab-quvvatlash masalalarida Davlatimiz rahbarining bevosita tashabbusi bilan koʻplab Farmon va Qarorlar qabul qilinganligini qayd etib oʻtish joiz.

Xususan, Oʻzbekiston Respublikasi Prezidentining “Xotin-qizlarni qoʻllab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari toʻgʻrisida”gi Farmoniga muvofiq “Moʻtabar ayol” koʻkrak nishoni taʼsis etildi. Mazkur koʻkrak nishoni bilan har yili 8-mart — “Xalqaro xotin-qizlar kuni” bayrami arafasida bir guruh faol xotin-qizlar taqdirlanishadi. Bu yilgi taqdirlanganlar orasida partiyamizning faxriysi 80 yoshli Oyniso ona Majidovaning ham borligi koʻplab partiyadoshlarimizni birdek quvontirdi.

Oʻn toʻrt nafar farzandini dunyoga keltirib, ularning har birini oliy maʼlumotli qilgan Oyniso ona “Qahramon ona” unvoni bilan ham taqdirlangan. Farzandlarining uch nafari ilm yoʻlini tanlagan boʻlib, hozirgi kunda ularning har uchalasi ham fan nomzodi. Qolgan farzandlari ham turli sohalarda Yurtimiz ravnaqi yoʻlida faoliyat olib borishmoqda.

Ellikka yaqin nabiralarning sevimli buvijonisi boʻlgan Oyniso ona oila va jamiyat, oila va mahalla munosabatlari bilan bogʻliq anʼanalar, sermazmun milliy qadriyatlarning ildizlarini, ajdodlarimiz merosini oʻrganishda va ommalashtirishda, oilaviy tarbiyada adolat hamda umuminsoniy qadriyatlarning oʻrnini yuksaltirishda va uning oilada uygʻunlashuvini taʼminlashda, oila va nikohning muqaddasligini yosh avlod ongiga chuqur singdirishda namuna koʻrsatib kelmoqda.

“Adolat” SDP Jizzax viloyat Kengashi
matbuot xizmati