Partiyamiz tashkil etilganiga 28 yil toʻlmoqda

Xalq deputatlari Kogon shahar Kengashi kotibiyati hamda “Adolat” SDP Kogon shahar Kengashi bilan hamkorlikda Oʻzbekiston “Adolat” sotsial-demokratik partiyasi tashkil topganiga 28 yil toʻlayotgani munosabati bilan Kogon shahar hokimligining kichik faollar zalida tadbir tashkil qilindi.

Tadbirni Kogon shahar hokimi H.Davlatov kirish soʻzi bilan boshlar ekan, Oʻzbekiston “Adolat” sotsial-demokratik partiyasi Oʻzbekistondagi siyosiy partiyalardan biri sifatida 1995-yil 18-fevralda tashkil etilganligi va shu kuni Oʻzbekiston Respublikasi Adliya vazirligidan roʻyxatdan oʻtganligini taʼkidlab oʻtdi. 

Jarayonda partiyaning bosh maqsadi Vatanimiz mustaqilligini mustahkamlash, demokratik islohotlarni jadallashtirish, huquqiy-demokratik, adolatli fuqarolik jamiyatini barpo etish va pirovardida, Oʻzbekistonni jahonda rivojlangan mamlakatlar safidan mustahkam oʻrin olishiga munosib hissa qoʻshish ekanligi aytib oʻtildi. 

Qayd etilganidek, partiyaning gʻoyaviy negizini sotsial-demokratiyaning 3 asosiy prinsipi: siyosiy, iqtisodiy va ijtimoiy adolat tashkil etadi. Qonun ustuvorligini taʼminlovchi adolatli ijtimoiy munosabatlar oʻrnatilgandagina odil jamiyat qurish mumkin.

Yigʻilishda soʻz olgan “Adolat” sotsial-demokratik partiyasi Buxoro viloyati Kengashi raisi M.Hamidov tadbir ishtirokchilariga partiya belgilab olgan yoʻnalishlari boʻyicha maqsadlarini tizimli ravishda yoʻlga qoʻyganligi va bu yoʻldan ogʻishmay dadil odimlayotganini aytib oʻtdi. 

Yigʻilish soʻngida Kogon shahar hokimi H.Davlatov hamda partiyaning viloyat Kengashi raisi M.Hamidov tomonidan bir guruh partiya faollari va deputatlarga qimmatbaho esdalik sovgʻalari hamda tashakkurnomalar topshirildi.

Sanjar Maydonov,
“Adolat” SDP Buxoro viloyat Kengashi rais oʻrinbosari.