“Porloq” Mahallasida tadbir

“Porloq” – Namangan shahrining Davlatobod tumanidagi yirik mahallalardan biri. Bu yerda toʻrt mingdan ortiq aholi istiqomat qiladi. Asosan koʻpqavatli uylardan iborat MFYga bir necha yildan beri partiyadoshimiz Gulchehra Nishonova raislik qiladi.

— Mahallamizda “Adolat” SDP aʼzolari oʻn kishidan ortiq, — deydi G. Nishonova. — Boshlangʻich tashkilot ham faoliyat koʻrsatadi. Unga oʻzim rahbarlik qilaman. Aholi oʻrtasida maʼnaviy-maʼrifiy tadbirlar oʻtkazishda partiyaning tuman va viloyat kengashlari bilan hamkorlikni yoʻlga qoʻyganmiz. Faollar, deputatlar tashrif buyurib turishadi.

Chindan ham mart oyining oʻzida mahallada “Adolat” SDP vakillar bilan birgalikda uchta tadbir oʻtkazildi. 8 mart bayrami arafasida “Har bir ayol — “Adolat” SDP eʼtirofida” mavzusida davra suhbati tashkil etildi. Partiyamizning “Tozalik yoʻlida birlashaylik” loyihasi asosida esa koʻchat ekish aksiyasi oʻtkazildi. “Navroʻz” bayrami tantanalari ham “adolat”chilar ishtirokida nishonlandi.

Kuni kecha esa mahalla ahli yana bir muhim voqea munosabati bilan toʻplandi. Yuzdan ortiq fuqaro qatnashgan tadbir “Yangilangan Konstitutsiya — xalq dardiga quloq soluvchi davlat asosi” deb nomlandi. Toʻplanganlar “Adolat” SDP viloyat Kengashi raisi oʻrinbosari Yorqinoy Hojimatovaning maʼruzasini tingladilar. Unda umumxalq referendumiga qoʻyilgan asosiy Qonunning mazmun-mohiyati atroflicha ochib berildi. Berilgan savollarga qaytarilgan javoblar mavzuning yanada kengroq ochib berdi.

- Tadbir jarayonida men odamlarning kayfiyatiga eʼtibor qaratdim, — deydi mehnat faxriysi Maʼmurjon Musurmonov. — Ularning yangilanayotgan Konstitutsiyaga qiziqishi kattaligi sezildi. Bu, yurtdoshlarimizning kelajakka ishonchi yuqori ekanligidan dalolatdir. Hammamiz referendumda faol qatnashishga qaror qildik.

Nurbek Abdullaev,

“Adolat” SDP Namangan viloyat

Kengashi matbuot kotibi.