Prezidentlikka nomzodning ishonchli vakili xorazmlik saylovchilar bilan uchrashdi

Oʻzbekiston Respublikasi Prezidentligiga partiyamizdan koʻrsatilgan nomzod – Maxmudova Robaxon Anvarovnaning Xorazm viloyatidagi ishonchli vakili Ikram Abdullayevning Respublika ixtisoslashtirilgan onkologiya va radiologiya ilmiy-amaliy tibbiyot markazi Xorazm filialida saylovchilar bilan uchrashuvi tashkil etildi.

Uchrashuvda onkologlar va boshqa tibbiyot sohasi xodimlari, “Al Xorazmiy” mahallasida istiqomat qiluvchi fuqarolar, partiya faollari va deputatlari hamda OAVlar vakillari ishtirok etishdi.

Uchrashuv avvalida ishonchli vakil nomzodning tarjimai holi bilan ishtirokchilarni tanishtirdi va Saylovoldi dasturidan munosib joy olgan xalqchil va ustuvor gʻoyalarning maqsad va vazifalari, mazmun va mohiyati toʻgʻrisida hayotiy misollar bilan tushuntirishlar berdi.

Nomzodning Saylovoldi dasturida Oʻzbekistonda adolatli jamiyat va adolatparvar davlat barpo etish jarayonlari, bunyodkor xalqimiz hamjihatligini mustahkamlash, yoshlarni ona yurtga sadoqat ruhida tarbiyalash, ularda tashabbuskorlik, fidoyilik, axloqiy fazilatlarni shakllantirish, xalqimiz, yoshlarimizning ruhiy dunyosini izdan chiqarishga qaratilgan turli buzgʻunchi kuchlar, maʼnaviy tahdidlar, axborot xurujlarining oldini olishning qonuniy asoslarini yaratish asosiy maqsad etib belgilangan.

– Saylovoldi dasturida ilgari surilgan “Qonun asosida yashash hayot tarzimizga aylanishi zarur. Buning uchun, eng avvalo, Konstitutsiya va qonunlarning ustunligini taʼminlashimiz shart. Bu borada Konstitutsiyamizda ilgʻor huquqiy mexanizmlar koʻzda tutilgan boʻlib, biz davlat xizmatiga ishga kiradigan har bir xodimni Konstitutsiyani bilish boʻyicha sinovdan oʻtkazish lozim, deb hisoblaymiz” kabi ustuvor masalalar diqqatimni tortdi, – dedi tadbir ishtirokchisi Azamat Bozarboyev. – Agar Konstitutsion bilimlarimiz mustahkam boʻlsa, jamiyatda sodir boʻladigan koʻpgina muammolarning oldi olinadi. Qonun ustuvorligini taʼminlashga qaratilgan nomzodning maqsadlari biz ishtirokchilarga juda ham maʼqul boʻldi.

Fikr va mulohazalarga boy boʻlgan uchrashuv soʻngida saylovchilar qiziqqan savollariga ishonchli vakil tomonidan batafsil javoblar olishdi.

Vohamizda ishonchli vakilning uchrashuvlari davom etmoqda.

Zamira ABDULLAYEVA,
"Adolat" SDP Xorazm viloyat Kengashi matbuot kotibi