Pushaymon koʻngillar bilan uchrashuv

“Inson uchun eng oliy neʼmat bu ozodlik ekanini shu yerga kelib angladim. Yoshlik qildim, endi esa mana umrimning bahorini panjara ortida oʻtkazmoqdaman. Mahkumlikdan ozod etilganimdan soʻng, albatta, oʻz yoʻlimni topib, halol yashashga vaʼda beraman. Tengdoshlarimga esa aytar soʻzim bor, avvalo, ota-onangizni, oilangizni va Vataningizning qadriga eting. Boshi berk koʻchalarga kirib qolishdan saqlaning!”, — degan afsus va nadomatlar iskanjasida oʻtirgan mahkumalarni koʻrib, har qanday insonning koʻngli boʻshab ketadi. Ayniqsa, bugungi kunda, jamiyatimizda xotin-qizlarimizning tutayotgan oʻrni, ular uchun yaratilayotgan sharoitlar, erkaklar bilan teng huquqliligini taʼminlash borasidagi islohotlar jarayonida bu kabi holatlar achinarlidir.

Mana shunday imkoniyatlardan foydalana olmay, bugun Pastdargʻom tuman 37-son manzil koloniyasida qilgan xatolarining jabrini bebaho umri bilan toʻlayotgan bir qancha ayol-qizlarimiz bilan Samarqand viloyat Kengashi deputati I.M.Boboqulova hamda tuman kengash deputatlari N.Allayorovalar ishtirokida uchrashuv tashkil etildi.

Unda Davlatimiz rahbarining Oliy Majlisga va xalqimizga yoʻllagan Murojaatnomasi , kirib kelgan 2023-yilda Xotin-qizlarning manfaatlari uchun zarur deb belgilangan amaliy rejalar yuzasidan oʻzaro erkin va atroflicha suhbati olib borildi.

Yigʻilish davomida ayollarimizga qonunchiligimizda belgilab qoʻyilgan barcha normalar, ularning haq-huquqlariga doir meʼyorlar batafsil tushuntirib oʻtildi.

Kunlar kelib bu ayollar ham sevimli yor, mehribon ona, qadrdon singil boʻlib oilasi bagʻriga qaytishadi va hali toʻylar qilib, koʻzlari qaygʻudan emas, shodlikdan yoshlanar. Bir kuni ular ham oilasi bagʻrida halovat topar. Nima boʻlganda ham biz uchun inʼom etilgan umrni yaxshilik va ezguliklarga baxshida etishimiz zarurligini barchamiz oʻz vaqtida anglamogʻimiz darkor.

Tadbir soʻngida esa ishtirokchilarning bir qator murojaat va fikrlari tinglandi.

Xonbuvi Hayitova,

“Adolat” SDP Pastdargʻom tuman kengashi raisi.