Qadriyatlar qalb gavhari

Inson qadrini ulugʻlash, avvalo, ayolga hurmat va ehtirom koʻrsatish, moʻtabar onalarni eʼzozlash, opa-singillarni qadrlash orqali roʻyobga chiqishi, shubhasiz. Davlatimiz rahbari tomonidan olib borilayotgan bugungi kundagi islohotlarning asosini yoshlarning, shuningdek, xotin-qizlarning taʼlim va kasbiy koʻnikmalar olishlari, munosib ish topishlariga har tomonlama koʻmaklashish, tadbirkorligini qoʻllab-quvvatlash, iqtidorli yosh xotin-qizlarni aniqlash va ularning qobiliyatlarini toʻgʻri yoʻnaltirishga masalalari tashkil etadi. 

Bu borada “Adolat” SDP ning “Xotin-qizlar bandligini taʼminlash — ustuvor vazifa”, “Bir adolatchi –yuz ayolga himoyachi” loyihalari doirasida viloyat Kengashi “Ayollar qanoti” tomonidan joylarda tadbirlar boʻlib oʻtmoqda.

Bugun Qashqadaryo viloyat tarix va madaniyat davlat muzeyida “Adolat” SDP ning viloyat Kengashi, Oila va xotin-qizlar viloyat boshqarmasi, Qarshi davlat universiteti, Qarshi shahar madaniyat markazi bilan hamkorlikda “Qadriyatlar — qalb gavhari” mavzusida madaniy-maʼrifiy tadbir tashkil etildi. Unda viloyat hokimi oʻrinbosari, Oila va xotin-qizlar boshqarmasi boshligʻi Komila Karomova maʼruza qildi.

Oiladan, uy ishidan ajralib korxona, tashkilotlarda ishlash imkoniyati boʻlmaganlar va yordamchi daromadga muhtoj shaxslar uchun Kasanachilik juda qulay hisoblanadi, — dedi , Oila va xotin-qizlar boshqarmasi boshligʻi Komila Karomova.- Kasanachilikning, ayniqsa, qishloq joylarida uy-roʻzgʻor ishlari, oilada bola tarbiyasi bilan band boʻlgan va yordamchi daromadga muhtoj ayollar uchun tashkil etilishi ahamiyatlidir. Hunarmandchilikni rivojlantirish va oiladagi yoshlarni shogirdlikka jalb etishda qoʻl keladi.

Shuningdek, tadbirda Qarshi shahar madaniyat markazi qoshidagi “Oydinoy” folklor-etnografik xalq ansamblining chiqishi, hunarmand ayollar ishtirokida “Kulolchilik” boʻyicha Zuhra Mengliqulovaning mahorat darsi, Xayriniso Qurbonovaning “Kashtachilik” va “Milliy matolardan zamonaviy liboslar yaratish” boʻyicha mahorat darslari tashkil etildi.

Tadbir barcha ishtirokchilarda katta taassurot qoldirdi.

Ulugʻbek Ashirov,
partiya faoli.