Qadriyatlar – tarbiya ibtidosi

Navroʻz ayyomi arafasida Chust tumanidagi 59-sonli Davlat maktabgacha taʼlim tashkilotida oʻtkazilgan maʼnaviy-maʼrifiy tadbir ana shu mazmunni mujassam etdi. Dastlab, jajji kichkintoylar ishtirokidagi milliy liboslar koʻrgazmasi namoyishi bilan boshlangan tadbir chinakam xalq sayliga aylanib ketdi.

Sir emas, Oʻzbekiston mafkurasi – ezgulik, odamiylik, gumanizm gʻoyasi! Bunda fikr tarbiyasi, milliy va umuminsoniy qadriyatlar tarbiyasi xalqimizning necha ming yillik hayotiy tushuncha va qadriyatlariga asoslanadi. Demak, bunday maqsad roʻyobi uchun hamma masʼul: ayniqsa, bolani dunyoga keltirgan ota-ona ham, uning tarbiyasini zimmasiga olgan tarbiyachi ham, taʼlim oʻqituvchisi ham, mahalla ham va mahalladagi nuroniy ham, ziyoli ham!

Tabiiyki, sharqning uch ming yillik qadriyati sanalmish Navroʻz, ayniqsa, bugungilikda ijtimoiy davlat sifatida qaralayotgan Yangi Oʻzbekiston hayotining ajralmas bir qismidir.

Binobarin, Chustning “Mehnatobod” mahallasida joylashgan 59-sonli Davlat maktabgacha taʼlim tashkilotida oʻtkazilgan bayram tantanasiga mahallaning 200 nafardan ziyod katta-kichigi taklif etildi.

Ular oʻtgan yilning soʻnggi choragida foydalanishga topshirilgan yangi va zamonaviy bogʻchada azaliy bayramni jajjilar bilan baham koʻrishdi. Doshqozon osildi. Sumalak pishirildi. Bahoriy taomlar tortiq etilgan dasturxon atrofida Navroʻzning asl mohiyati, ayniqsa uning kamol topayotgan yosh avlod shuurida qoldiradigan maʼnaviy ahamiyati ochib berildi. Zotan, doshqozonda pishirilgan moʻl-koʻl sumalak, bu – koʻpning rizqi! Elga ulashiladigan oqibat, mehr-saxovat, hamjihatlik, shukronalik ramzidir.

Tantanada Chust tumani hokimi Bekzod Hamdamov, sektorlar rahbarlari, shuningdek, Respublika Maʼnaviyat va maʼrifat Markazi Namangan viloyat boʻlimi rahbari Musoxon Appoqov ishtirok etdi va ular ham boy milliy qadriyatlarimiz ahamiyatini qayd etdilar. Xususan:

– Dunyoda keskin kurash va raqobat hukm surmoqda, manfaatlar toʻqnashuvi kuchaymoqda, – dedi Musoxon Appoqov. – Globallashuv jarayonlari insoniyat uchun beqiyos yangi imkoniyatlar bilan birga, kutilmagan muammolarni ham keltirib chiqarmoqda. Milliy oʻzlik va maʼnaviy qadriyatlarga qarshi tahdid va xatarlar tobora ortmoqda. Demak, zamonning oʻzi maʼnaviy jabhada jipslashishni, bir yoqadan bosh chiqarishni taqozo etmoqda. Aytishim joizki, mana bunday davrada, bir doshqozonda pishgan sumalakdan totish, uni birgalikda, shodu xurramlikda baham koʻrish, oʻzaro bir-birimizga yaxshi soʻzlar, tilaklar, istaklar aytib, odamlarni shukronalikka chorlash har birimizning ezgu maqsadimizdir. Eng muhimi, bunday xayrli maqsadlar endigina kamol topayotgan farzandlarimiz ishtirokida, ularning koʻzi oʻngida amalga oshirilishi yanada afzal. Chunki, bunday hol nafaqat targʻib mahsuli boʻlib qoladi, shu bilan birga, yoshlarni millatga, xalqqa, vatanga muhabbat, kattalarga hurmat, milliy anʼana va qadriyatlarimizga eʼtibor ruhida kamol toptirishning juda katta tarbiya maktabini yaratgan boʻlamiz.

Tadbir soʻngida maktabgacha taʼlim tashkilotlari vakillari uchun “Milliy qadriyatlar, urf-odatlarning bolalar tarbiyasidagi roli” mavzusida viloyat oʻquv-amaliy seminari ham oʻtkazildi.

Saidolim Abdurahmonov,

“Adolat” SDP Namangan viloyati Maktabgacha taʼlim boshqarmasi,

Axborot xizmati rahbari.