Qalbimizda mangu yashar buyuk siymolar

Bugun Oʻzbekiston “Adolat” SDP Kasbi tuman Kengashi va tuman hokimligi, shuningdek, tuman xalq taʼlimi boʻlimi tomonidan hududdagi madaniyat markazi tadbirgohida Zahiriddin Muhammad Bobur tavalludining 540 yilligiga bagʻishlab “Oʻzbek mumtoz adabiyotining yirik vakili” mavzusida maʼnaviy-maʼrifiy, adabiy-badiiy tadbir boʻlib oʻtdi. Unda partiya faollari, adabiyotshunos olimlar, oʻqituvchilar, keng jamoatchilik va ommaviy axborot vositalari vakillari qatnashdi.

Tadbirda soʻzga chiqqan xalq deputatlari Kasbi tuman Kengashi deputati Abbos Xasanov shoh va shoir ijodining sarchashmasi hisoblangan memuar asar “Boburnoma”, nafaqat oʻzbek milliy adabiyotimizning noyob durdonalaridan, balki jahon adabiyotining nodir namunalaridan biri ekanligi xususida fikr mulohaza yuritdi.

“Boburnoma”ning ahamiyatli jihatlaridan yana biri, oʻz davrida adabiyotimizda nasr janrida yaratilgan yirik asarlardan biri sifatida ham muhim oʻrin tutadi,- dedi Abbos Xasanov.- Ushbu qomusiy kitob 30 dan ortiq tilga tarjima qilinib, ayni paytda koʻplab millatlar undan bahramand boʻlmoqda.

Shuningdek, tadbirda partiya faoli adabiyotshunos Sarvinoz Karimova, Nargiza Hamroyeva va boshqalar ham soʻzga chiqib, Zahiriddin Muhammad Bobur va u tomonidan qoldirilgan boy madaniy, tarixiy meros haqida ishtirokchilarga keng tushuncha berdilar.

Alloma va davlat arbobi Zahiriddin Muhammad Bobur tavalludining 540 yilligiga bagʻishlangan tadbirlar bugun partiyaning viloyat va Qarshi shahar Kengashi tomonidan Qarshi muhandislik iqtisodiyot institutida ham boʻlib oʻtdi.

Gulnoza Rajabova,
Abdulaziz Abdiyev,
“Adolat” SDP Qashqadaryo viloyat Kengashi raisi
oʻrinbosarlari.