Qashqadaryoda 440 ming aholi daromadli ish bilan taʼminlanadi

Soʻnggi yillarda davlat va jamiyatni isloh qilishda, avvalo, fuqarolar bilan davlat organlari oʻrtasida samarali muloqot tizimi yoʻlga qoʻyildi. Davlat rahbaridan tortib eng quyi boʻgʻin rahbarlarining aholi bilan doimiy va yuzma-yuz muloqot olib borish tizimi joriy qilindi.

Xususan, Prezidentimizning hududlardagi bunyodkorlik ishlari, yirik loyihalar va aholi hayoti bilan yaqindan tanishish maqsadida viloyatlarga tashrifi anʼana tusiga kirdi. Jumladan, joriy yilning 24-fevral kuni davlatimiz rahbari Qashqadaryo viloyatida boʻlib, viloyatda amalga oshirilayotgan ijtimoiy-iqtisodiy islohotlarning borishi bilan tanishdi.  

Tashrif avvalida Prezidentimiz Qarshi tumanida 2021-yilda yangidan tashkil etilgan Yangi Batosh mahallasida boʻlib, mahalla infratuzilmasi, fuqarolar turmush tarzi bilan yaqindan tanishdi. Mahallada yangidan tashkil etilgan 660 oʻrinli maktabda boʻlib, u yerda oʻquvchi yoshlar va pedagoglar bilan muloqot qildi.  

Shu oʻrinda aytib oʻtish kerak, bugun mamlakatda amalga oshirilayotgan har bir islohotda taʼlim sohasiga alohida eʼtibor qaratilmoqda. Birgina Qashqadaryo viloyati misolida oladigan boʻlsak, viloyatda 155 ming oʻquvchi oʻrni yetishmas edi. Buning uchun viloyatga 1 trillion mablagʻ ajratilib, 215 ta maktab qurildi. Natijada Qashqadaryo viloyati maktablar soni boʻyicha respublikada birinchi oʻringa koʻtarildi.  

Muloqot davomida davlat rahbari endilikda oʻquvchilar maktabdan chet tillarini va hunar oʻrganib chiqishi, 11-sinf hayot yoʻli sinfi boʻlishi va har bir yosh shunday oʻqib, jamiyatda oʻz oʻrnini topsa, bu Oʻzbekistonimizga mustahkam zamin boʻlishini taʼkidlab oʻtdi.  

Shu bilan birga, tashrif davomida Prezidentimiz Qarshi shahridagi “Buyuk Turon” kichik sanoat zonasida ham boʻlib, bu yerda tadbirkorlar uchun yaratilgan sharoitlar va loyihalarning amalga oshirilishi hamda ishchilar mehnat faoliyati bilan tanishdi. Ushbu sanoat zonasida hozirga qadar 2 ta loyiha amalga oshirilgan boʻlib, 500 dan ortiq ish oʻrni yaratilgan. Joriy yil oxiriga qadar yana 2 ta loyiha ishga tushiriladi va umumiy ish oʻrinlari soni 1 ming 500 taga yetadi.  

Albatta, hududlar iqtisodiyotini yuksaltirish va aholi turmush farovonligini oshirishda bunday sanoat zonalarining oʻrni beqiyos sanaladi. Boisi, Qashqadaryo viloyati tadbirkorlikni rivojlantirish uchun mehnatkash aholisi soni yuqori, boy tabiiy resurslari yetarli boʻlgan viloyat hisoblanadi.  

Jumladan, viloyat hududida yerosti va yerusti tabiiy qazilma boyliklari, qolaversa qishloq xoʻjaligi mahsulotlari boʻyicha ulkan xom ashyo bazasi hamda isteʼmol bozori mavjud. Ammo, viloyatda yetishtirilayotgan qishloq xoʻjalik mahsulotlarining sanoat usulida qayta ishlash darajasi past. Xususan, yetishtirilgan mevaning 12 foizi, sabzavotning 2 foizi, uzumning 4,8 foizi, goʻshtning 1,1 foizi, sutning 2,8 foizi qayta ishlanayotganligi, bu mahsulotlarga viloyatning oʻzida katta bozor borligini koʻrsatadi.  

Viloyatda keyingi 5 yilda yetishtiriladigan qariyb 10 million tonnalik chorvachilik mahsulotlarini yoki qariyb 65 million tonnalik dehqonchilik mahsulotlarini qayta ishlash boʻyicha yangi investitsiya loyihalarini joriy etish zarurati mavjud. Shu bois, viloyat faollari bilan boʻlib oʻtgan yigʻilishda davlatimiz rahbari viloyatni kelgusi yillarda rivojlantirishga qaratilgan chora-tadbirlarni belgilab berdi.  

Yigʻilishda, avvalo, viloyatda energiya taʼminotini yaxshilash choralari koʻrsatib oʻtildi. 2023-yilda viloyatda elektr isteʼmoli 6,9 milliard kilovatt soatni tashkil etib, 310 million kilovatt taqchillik boʻlishi kutilayotgani hisobga olinib, Nishon va Chiroqchi tumanlarida 3 ta quyosh elektr stansiyasini ishga tushirish rejalashtirilgan.  

Shu bilan birga, elektr tarmoqlari yangilanib, energiya isteʼmoli yuqori qurilmalar almashtiriladi. Yiliga 2,2 milliard kilovatt sarflaydigan Qarshi magistral kanalining nasos stansiyalarida 6 chastotali boshqarish vositasi oʻrnatiladi. Bu orqali shu yilda 50 million kilovatt, kelgusi yildan boshlab yiliga 175 million kilovatt elektr iqtisod qilinadi.  

Yigʻilishda viloyatda sanoatni rivojlantirish, tadbirkorlik va kasanachilikni qoʻllab-quvvatlash boʻyicha ham qator choralar belgilab olindi. Xususan, 2023-yilda viloyatga 1,5 milliard dollar investitsiya jalb qilinib, 440 ming aholini daromadli ish bilan taʼminlanadi.  

Ayni kunda viloyatdagi tadbirkorlar uchun yaratib berilgan sharoit sabab 80 ta mahallada 6 mingdan ziyod aholi kasanachilik bilan shugʻullanib kelmoqda. Xususan, kasanachilikka jalb qilingan ehtiyojmand fuqaroga ijtimoiy nafaqa 6 oy davomida toʻlab berilmoqda. Asbob-uskuna va xomashyo sotib olishlari uchun esa 9 million soʻmgacha subsidiya taqdim etiladi. Bular orqali Qashqadaryoda yana 150 ta mahallada qoʻshimcha 20 ming aholini kasanachi qilish mumkinligi qayd etildi.  

Shuningdek, aholi bandligini taʼminlash maqsadida Dehqonobod, Yakkabogʻ, Shahrisabz va Nishon tumanlarida suv taʼminotini yaxshilab, 10 ming aholini band qilish, Mirishkordagi 5 ming gektarli tabiiy koʻlda baliq yetishtirishni koʻpaytirish vazifalari belgilab olindi.  

Xulosa qilib aytganda, tashrif davomida belgilab berilgan vazifa va rejalar, avvalo, viloyat aholisi farovonligini oshirish, turmush tarzini yanada yaxshilashga qaratilgani bilan ahamiyatlidir.  

Maxfirat Xushvaqtova,
Oliy Majlis Qonunchilik palatasi deputati