Qashqadaryoga tashrif chogʻida muhim masalalar belgilab berildi

Yurtboshimiz Shavkat Miromonovich Mirziyoyev hududlarda ijtimoiy-iqtisodiy islohotlarning borishi, amalga oshirilayotgan bunyodkorlik ishlari, aholi turmushi bilan yaqindan tanishish maqsadida Qashqadaryoda viloyatida boʻldi.

Tashrif davomida davlatimiz rahbari viloyatda olib borilayotgan bunyodkorlik ishlari, qishloq aholisining turmush darajasini koʻtarish, tumanlarni sanoatlashtirish, ish oʻrinlarini koʻpaytirish, ijtimoiy sharoitlarni yaxshilash masalasiga alohida eʼtibor qaratdi.

Davlatimiz rahbari rejadan tashqari tarzda Qarshi tumani tibbiyot birlashmasida hamda Beshkent shahridagi 12-maktabda boʻlib u yerlardagi asl holat bilan tanishdi. Tibbiyot xodimlari va bemorlar bilan suhbat chogʻida “Bugun Qashqadaryoga kelishimizdan maqsad viloyatning 3 yarim millionlik aholisi turmush sharoitini yaxshilash, ogʻirini engil qilish, sanoat, qishloq xoʻjaligi, ijtimoiy sohalarni rivojlantirish. Yoʻldan oʻtib ketayotib, shifoxona qanday ekan, deb kirdim. Holatni oʻzim koʻrib, oddiy odamlar bilan koʻproq muloqot qilib, qaror qabul qilish – mening eng katta maqsad-muddaom. Avval ham aytganimdek, taʼlim bilan tibbiyot sifatli boʻlsa, odamlar rozi boʻladi” – dedi Shavkat Mirziyoyev.

Shundan soʻng Shavkat Mirziyoyev Qarshi shahridagi “Oydin” mahallasida boʻlib, aholi turmushi, hududdagi obodlik va kuz-qish mavsumiga tayyorgarlik bilan yaqindan tanishdi. Mahalla faollari bilan suhbat chogʻida yangi “Mahalla yettiligi”, “Mahalla byudjeti” tizimi tashkil etilishi, mazkur tizimni samarali ishlatish, bunday keng vakolat va mablagʻlardan foydalanib, mahalladagi dolzarb muammolarni hal qilish zarurligini taʼkidladi. Aholini tadbirkorlikka, xotin-qizlarni kasb-hunarlarga jalb etib, daromadini oshirish, yoshlar uchun madaniy tadbirlar, musobaqalar tashkil etish muhimligi qayd etildi.

Tashrif soʻngida prezidentimiz Shavkat Mirziyoyev rahbarligida Qarshi shahrida viloyatini ijtimoiy-iqtisodiy rivojlantirish chora-tadbirlariga bagʻishlangan yigʻilish oʻtkazildi. Unda asosiy eʼtibor sanoat, turizm, qishloq xoʻjaligi va tadbirkorlikni rivojlantirishga qaratildi. Yigʻilishda “Mamlakatimiz tinchligi, xalqimiz farovonligi va kelajagi uchun yangi korxonalar, yangi bozorlar, investitsiya, ish oʻrinlari, katta-katta tushumlar kerak. Jahon bozoridagi tebranishlar, hamkor davlatlardagi savdo cheklovlari davom etaversa, mahsulotlarni qayerga va qanday sotish kerak? Buning uchun qaysi korxonaga qanday koʻmak berish zarur, – deya savollar qoʻydi Shavkat Mirziyoyev.

Qolaversa, Prezidentimiz tomonidan Qashqadaryo iqtisodiyoti faqatgina yirik korxonalarga qarab qolmasligi kerakligini aytildi. Viloyatda isteʼmol tovarlari ishlab chiqarishda oʻsish surʼatlari respublika koʻrsatkichidan 3 barobar kam. Ayniqsa, kichik biznesning sanoatdagi ulushi eng oxirgi oʻrinlarda ekanligi taʼkidlandi.

Yigʻilish soʻngida Shavkat Mirziyoyev mutasaddilarga amalga oshirilayotgan loyihalar doirasida qilinishi lozim boʻlgan ishlarni sifatli va oʻz vaqtida bajarish yuzasidan topshiriqlar berdi.

Orif Shukurov,

 “Adolat” SDP Jizzax viloyat Kengashi raisi.