Qoʻshningni tinchligi sening tinchliging

Butun dunyoda xavfsizlik masalasi barcha mamlakatlar uchun jiddiy muammoga aylangan. Bugun jahon hamjamiyatining asosiy eʼtibori tinchlik, barqarorlik va xavfsizlikni taʼminlash boʻlib, shu bois, dunyoviy oʻzgarishlar xususiyatlari, xavfsizlik mexanizmlari, umuminsoniy manfaatlarning ustuvorligi, maʼrifat va diniy bagʻrikenglik, barqaror taraqqiyot omillari kabi masalalarga alohida eʼtibor berilmoqda. Mamlakatimizda ham tinchlik va barqarorlikni, millatlararo totuvlikni mustahkamlash borasida salmoqli ishlar amalga oshirilmoqda. Jumladan, Oʻzbekiston — 2030 strategiyasida xavfsizlik, diniy bagʻrikenglik va millatlararo totuvlikni mustahkamlash masalalari alohida eʼtiborga molik.
Oʻzbekiston Respublikasi Prezidenti Shavkat Mirziyoyevning Birlashgan Millatlar Tashkiloti Bosh Assambleyasining 78-sessiyasidagi nutqida ham ayni shu masalalarga alohida urgʻu qaratilgani mamlakatimiz dunyodagi barcha davlatlar, avvalo, qoʻshni mamlakatlar bilan qoʻshnichilik, doʻstlik va hamkorlik munosabatlarini rivojlantirishga eʼtibor qaratayotganining yana bir dalili.
Oʻzbek xalqi adolat, tinchlik, ahil qoʻshnichilik va insonparvarlikning nozik kurtaklarini asrlar osha asrab-avaylab kelmoqda. Bu tamoyillar Oʻzbekistonning oʻz milliy manfaatlarini koʻzlab, tinchlik siyosatini olib borishning qonuniy asoslarini belgilab berishi bilan birga, barqaror va tinchlikparvar tashqi siyosat, mintaqaviy hamkorlikning asosiy negizini tashkil etadi.
Xalqimizda “Qoʻshning tinch – sen tinch” degan ibratli maqol bor. Ammo, “Qoʻshning tinch boʻlmogʻi uchun nima qilishing kerak?” degan savol qoʻyilsa, har bir odam oʻylanib qoladi. Uzoqni koʻra biladigan donishmandlar esa yaxshi qoʻshnichilik borasidagi muammolarga katta ahamiyat qaratishgan. Prezidentimiz Shavkat Mirziyoyev Birlashgan millatlar tashkilotining minbaridan turib Afgʻon xalqining dardiga malham boʻlish, oyoqqa turishi uchun koʻmaklashish borasida butun jahon ahlini birlashishga chorladi. Afgʻoniston xalqiga insonparvarlik yordamlarini koʻrsatishga, mamlakatning muzlatilgan xalqaro aktivlarini bu oʻlkadagi oʻtkir ijtimoiy muammolarni hal etishga yoʻnaltirishga, geosiyosiy jarayonlar avj olgan, bugungi tarixiy tub burilish pallada kelgusi avlodlarga sayyoramizni obod holda qoldirishga chaqirdi.
Shuni unutmasligimiz kerakki, bugungi tahlikali zamonda, yon-atrofimizda turli xavf-xatarlar kuchayib borayotgan bir vaqtda eng katta va bebaho boylik bu xalqlarning oʻzaro hamfikrlikda, hamjihatlikda yer yuzidagi tinchlik-osoyishtalikni koʻz qorachigʻidek saqlashi lozim. Ahil qoʻshnichilik aloqalarini yoʻlga qoʻyib doʻstlik va hamjihatlik, oʻzaro hurmat va mehr-oqibat muhitini yanada mustahkamlash, doimo hushyor va ogoh boʻlish davr talabi. Buni har birimiz chuqur his etishimiz darkor.
Taʼkidlash joizki, tinchlikni, barqarorlikni, osoyishtalikni taʼminlash masalalari partiyamiz tomonidan ilgari surilayotgan saylovoldi dasturda ham oʻz aksini topgan. Jumladan, bizning maqsadimiz – Oʻzbekistonning davlatlararo munosabatlarda teng huquqli va masʼuliyatli sherik boʻlishiga yordam berish. Biz davlatning mustaqilligi va suverenitetini mustahkamlash, xalqaro munosabatlarning toʻla huquqli subyekti sifatida davlatimiz oʻrni va rolini kuchaytirish, Oʻzbekistonning turli harbiy bloklar ishtirokiga yoʻl qoʻymaslik tarafdorimiz.
Biz tinchliksevar xalqmiz. Qoʻshnimiz, uyimiz, mahallamiz — yurtimiz tinch boʻlsa xotirjam mehnat qilib, har qanday yutuq va marraga erishamiz.

Muhiba Bababekova,
Xalq deputatlari Samarqand shahar Kengashi deputati.