“Qon topshir – hayot inʼom et”

Bugun Respublikamiz boʻyicha 1-iyun – “Xalqaro bolalarni himoya qilish kuni” munosabati bilan “Bor mehrimiz senga, bolajon” shiori ostida oʻtkaziladigan begʻaraz donorlik aksiyasi “Adolat” SDP va Respublika qon qoʻyish markazi bilan hamkorlikda, uning respublikadagi hududiy boʻlimlarida oʻtkazilmoqda. Mazkur tadbir Sirdaryo viloyati qon quyish stansiyasida xam koʻtarinki ruhda boʻlib oʻtdi. Sirdaryo viloyat qon quyish stansiyasida  oʻtkazilgan xayriya tadbirida “Adolat” SDP Sirdaryo viloyat Kengashi xodimlari, Yoshlar qanoti, Ayollar qanoti, viloyat va tuman shahar Kengashi deputatlari, Guliston shahar, Guliston tuman, Mirzaobod tuman Kengashi raislari, koʻngilli fuqarolar Ichki ishlar boʻlimi  faol ishtirok etishdi.

– Donor oʻz qoni bilan inson hayotini saqlab qolishi mumkin, chunki turli noyob jarrohlik amaliyotlarining muvaffaqiyatli kechishida, onkologik va gematologlik kasalliklarni davolashda, baʼzan tugʻruq jarayonlarida, baxtsiz hodisalarda qon va uning komponentlarining ahamiyati katta.

Donorlik yurak va qon tomirlari salomatligini mustahkamlaydi.Yiliga kamida bir marta qon topshirish yurak xuruji xavfini 88% ga kamaytiradi. Gap shundaki, agar qon juda quyuq boʻlsa, qon tomirlarining tiqilib qolish ehtimoli ortadi. Bu yuqori gemoglobin va ortiqcha temir moddasi tufayli sodir boʻladi.

Biz qon topshirganimizda suyuqlik qismini — plazmani ham, hujayralarni ham yoʻqotamiz. Ammo plazma qizil qon hujayralariga qaraganda tezroq yangilanadi, shuning uchun qon suyuqlashadi va yurak xuruji kamroq boʻladi.

Tibbiyot nuqtai nazaridan qon berishning organizmga foydali jihatlari, qon topshirish, qon aylanishini yaxshilashi tibbiyot xodimlari tomonidan isbotlangan. Bugungi xayriya aksiyada 18 yoshdan-60 yoshgacha sogʻlom fuqarolar qatnashishdi.

Mazkur tadbirda 90 nafardan ortiq fuqarolar qatnashib, 44 nafar donor tibbiyot xodimlari tomonidan tanlanib 22 litr 572 gramm qon topshirildi.

Donorlik aksiyasi davom etmoqda.  

“Adolat” SDP Sirdaryo viloyat kengashi Matbuot xizmati.