Qonun loyihasi chuqur muhokama qilindi

Oliy Majlis Qonunchilik palatasidagi “Adolat” SDP fraksiyasining navbatdagi yig'ilishida har bir qonun loyihasi chuqur muhokama qilinib, ularning jamiyat hayoti uchun, oddiy fuqarolar uchun nechog'lik zarur ekanligiga e'tibor qaratildi.

Yig'ilishda ko'rib chiqilgan dastlabki hujjat “O'zbekiston Respublikasining ayrim qonun hujjatlariga tadbirkorlarning bank hisobvaraqlaridagi pul mablag'lari daxlsizligini ta'minlashga qaratilgan qo'shimcha va o'zgartishlar kiritish to'g'risida”gi qonun loyihasi bo'ldi.

Deputatlar mazkur qonun loyihasining qabul qilinishi, kelgusida tadbirkorlarga qanday imkoniyatlar berishi mumkinligi va ularning tadbirkorlik faoliyatini amalga oshirishida yaratadigan imkoniyatlari bo'yicha o'z savollari va fikr-mulohazalarini bildirdi.

Ushbu hujjat tadbirkorlik faoliyatini amalga oshirayotgan fuqarolarning huquqlarini himoya qilishga xizmat qilishini inobatga olib, muhokamalar davomida loyiha bo'yicha bir qator takliflar berishdi.

Deputatlarning aytishicha, qonun loyihasi tadbirkorlik sub'ektlarining qonuniy manfaatlarini himoya qilishning huquqiy choralarini kuchaytirishga hamda ularning mulk huquqi daxlsizligining huquqiy himoyasi samaradorligini oshirishga xizmat qiladi.

—Kichik va o'rta biznes – barqaror rivojlanishning kafolatidir, — deydi Oliy Majlis Qonunchilik palatasidagi  “Adolat” SDP fraksiyasi a'zosi Dilshod Hamzaev. — Partiyamiz ham barqaror iqtisodiy o'sish va halqimiz daromadining izchil oshirishning muhim omili sifatida kichik biznesni davlat tomonidan har tomonlama qo'llab-quvvatlash zarur, deb biladi. Shu bois, yig'ilishda ushbu qonun loyihasi fraksiyamizning diqqat markazida bo'ldi va qizg'in baxs-munozalar, savol-javoblardan so'ng, uni qo'llab-quvvatladik.

Yig'ilishda fraksiya vakolatiga taalluqli boshqa masalalar ham ko'rib chiqildi.