Referendum ezgu harakatlarning mustahkam poydevoridir

Bugun prezidentimiz Sh.Mirziyoyev tomonidan ilgari surilgan Konstitutsiyani “Xalq Konstitutsiyasi”ga aylantirish yoʻlidagi gʻoyalari amalga oshishi uchun dadil bir qadam tashlanmoqda: biz hayotimizda muhim ahamiyatga ega eng katta siyosiy jarayon arafasida turibmiz. Konstitutsiyaning yangi tahriri qabul qilinishi oʻz-oʻzidan amalga oshiriladigan jarayon emas, albatta. Yangi Oʻzbekiston bugun har jabhada shiddat bilan rivojlanmoqda. Bugungi Oʻzbekiston kechagi Oʻzbekiston emas, bugun odamlar ham kechagi odamlar emas. Bugun bizga inson qadri ulugʻlangan, uning shaʼni himoyalangan qadri baland Konstitutsiya kerak. Referendum ana shu ezgu harakatlarning bir qismidir.

Bugun yoshlarga har doimgidan-da koʻproq eʼtibor berilmoqda. Buni oʻzimning hayotim misolida aytadigan boʻlsam, men 2021/2022 oʻquv yilida Navoiy nomidagi davlat stipendiyasini qoʻlga kiritdim, “Yangi Oʻzbekistonni oʻzimiz, oʻz qoʻllarimiz bilan bunyod etamiz” nomli respublika esselar tanlovida gʻoliblikni qoʻlga kiritdim, xalqaro miqyosda tanlovlar, konferensiyalar ishtirokchisiman. Men oddiy talaba va oddiy oilaning qiziman. Bugun men kabi yoshlarning taʼlimiga eʼtibor tufayli mening oʻrnimda Oʻzbekistonning barcha qizlari boʻlishi mumkin. Bugun Konstitutsiyada “Davlat isteʼdodli yoshlarning moddiy ahvolidan qatʼiy nazar, taʼlimni davom ettirishini kafolatlaydi” degan norma kiritilmoqda. Bu albatta, yoshlarning taʼlimi, ularning ilm-fanga qiziqishlarini ragʻbatlantirish borasida qilinayotgan ishlarga huquqiy asos boʻlib xizmat qiladi. Umuman, Konstitutsiyada yoshlarga doir alohida bob kiritilganligi, isteʼdodli yoshlarni har tomonlama qoʻllab-quvvatlash va ularning iqtidorini yuzaga chiqarishda muhim ahamiyatga ega. Shunday ekan, aziz yoshlar, tengdoshlar barchangizni referendumda faollikka chorlayman. Zero, Konstitutsiya meniki, seniki, biznikidir. Men Vatanim uchun, xalqim uchun, kelajagim uchun ovoz beraman. Men befarq emasman.

Jalilova Muxlisa,

SamDU talabasi, O’zbekiston Respublikasi Qonunchilik palatasi

huzuridagi yoshlar parlamenti a’zosi.